धुळे जिल्ह्यातील साक्री रोडवरील जिल्हा शासकीय रुग्णालयाच्या आवारात १०० खाटांचे अत्याधुनिक स्त्री रुग्णालय उभारण्यात आले असून, त्याचे काम अंतिम टप्प्यात आहे. सार्वजनिक आरोग्य विभागाच्या अंतर्गत उभारण्यात येत असलेले हे रुग्णालय लवकरच कार्यान्वित होण्याच्या दृष्टीने सज्ज झाले आहे. अत्याधुनिक वैद्यकीय उपकरणांची खरेदीही सुरू असून, लवकरच परिसरातील महिलांना नवे आरोग्य केंद्र मिळणार आहे.
ग्रामीण गरोदर माता व महिलांना मोठा दिलासा
धुळे शहरासह शिरपूर, साक्री, शिंदखेडा आणि आजूबाजूच्या तालुक्यांतील महिला रुग्णांची मोठ्या प्रमाणावर वर्दळ असते. हे रुग्णालय सुरू झाल्यानंतर ग्रामीण महिलांना वेळेवर आणि दर्जेदार उपचार मिळतील. गरोदर मातांसाठी हे रुग्णालय वरदान ठरणार असून, त्यांना मोफत व सन्मानजनक आरोग्यसेवा पुरवली जाणार आहे.
आधुनिक सुविधा असलेले हॉस्पिटल
या स्त्री रुग्णालयात दहा खाटांचे सुसज्ज आयसीयू, १२ नवजात बालकांसाठी एनआयसीयू युनिट, प्रसूतीपूर्व आणि प्रसूतिनंतरच्या वॉर्डस्, मॉनिटरिंग युनिट, ऑपरेशन थिएटर, सोनोग्राफी, एक्स-रे, सीटी स्कॅन, एमआरआय यांसारख्या सुविधा आहेत. शिवाय कॅथलॅब, वेंटिलेटर, ऑक्सिजन, रुग्णवाहिका, वेटिंग एरिया, स्वच्छतागृहे आणि पिण्याच्या पाण्याचीही सुविधा उपलब्ध आहे.
अनुभवसंपन्न वैद्यकीय टीम तैनात
रुग्णालयात सध्या १६ डॉक्टर, ७ तज्ज्ञ डॉक्टर – त्यात ३ स्त्रीरोगतज्ज्ञ, ३ भूलतज्ज्ञ आणि २ बालरोगतज्ज्ञ कार्यरत आहेत. याशिवाय सुमारे ५० परिचारिका आणि सहाय्यक कर्मचारी वर्गाची नियुक्ती करण्यात आली आहे. काही चतुर्थश्रेणी पदे कंत्राटी पद्धतीने भरली जाणार असून त्याबाबतची प्रक्रिया प्रस्तावित आहे.
श्री भाऊसाहेब हिरे रुग्णालयावरील ताण होणार कमी
या नवीन स्त्री रुग्णालयाच्या सुरूवातीमुळे श्री भाऊसाहेब हिरे रुग्णालयातील गरोदर महिलांवरील आणि बालरोग विभागावरील ताण कमी होईल. गंभीर रुग्णांवर या नव्या रुग्णालयातच शस्त्रक्रिया करता येणार असल्यामुळे विशेषतः ग्रामीण रुग्णांना वेळेत उपचार मिळण्यास मदत होईल.
सुरक्षित आणि सुविधा-संपन्न परिसर
सध्या फायर ऑडिटची प्रक्रिया अंतिम टप्प्यात असून, रुग्णालयाच्या परिसरात रात्रीच्या वेळी चांगली प्रकाश व्यवस्था ठेवण्यासाठी पथदीप बसवण्याचे काम सुरू आहे. व्यवस्थापनाच्या माहितीनुसार सर्व औपचारिकता पूर्ण झाल्यानंतर लवकरच रुग्णालय कार्यान्वित करण्यात येईल.
२०१७ पासूनच्या प्रतीक्षेला आता पूर्णविराम
या रुग्णालयासाठी २०१७-१८ मध्ये निधी मंजूर झाला होता, मात्र कोविड महामारीमुळे काम थांबले. पुढे वाढीव निधीची मंजुरी मिळाल्यानंतर काम पुन्हा वेगाने सुरू करण्यात आले आणि आता रुग्णालय अंतिम टप्प्यात पोहोचले आहे.
स्त्री व बाल आरोग्य सेवांमध्ये नवा अध्याय
नवीन स्त्री रुग्णालय कार्यान्वित झाल्यानंतर धुळे जिल्ह्यातील स्त्री व बाल आरोग्य क्षेत्रात मोलाची भर पडणार आहे. महिलांना सुरक्षित, गोपनीय आणि दर्जेदार आरोग्यसेवा मिळेल. ग्रामीण भागातील गरजू आणि गरीब महिलांसाठी हे रुग्णालय एक आशेचा किरण ठरेल.
Comments are closed.