यशवंतराव चव्हाण महाराष्ट्र मुक्त विद्यापीठानं आपले सगळे अभ्यासक्रमांचे निकाल अवघ्या ३० दिवसांत जाहीर करून विद्यार्थ्यांच्या मनात समाधान भरलय. २०२४-२५ या शैक्षणिक वर्षात उन्हाळी सत्राच्या परीक्षा २७ जून ते १६ जुलैदरम्यान पार पडल्या. या परीक्षांमध्ये साडेचार लाखाहून जास्त विद्यार्थी सहभागी झाले होते.
२७९ सत्रांनुसार झालेल्या या परीक्षांमध्ये ४ लाख ६७ हजार ४४९ विद्यार्थ्यांनी भाग घेतला. महाराष्ट्रभरातील ५७९ परीक्षा केंद्रांवर १३४३ प्रश्नपत्रिका वेळेवर पोहचवून परीक्षा पूर्णपणे गोपनीय आणि ऑनलाइन पद्धतीनं पार पडल्या.
एकूण नोंदणी झालेल्या २७ लाख २४ हजार ९४२ उत्तरपत्रिकांपैकी २३ लाख ५० हजार ३१८ उत्तरपत्रिका वेळेत तपासून निकाल घोषित करणं हे विद्यापीठासाठी मोठं आव्हान होतं.
या सगळ्या कामासाठी विद्यापीठानं अत्याधुनिक स्कॅनिंग सिस्टम वापरली. महाराष्ट्रातील १०९ ऑनलाइन मूल्यांकन केंद्रांवर परीक्षकांच्या बायोमेट्रिक आणि फेस डिटेक्शनच्या आधारे उत्तरपत्रिकांचं मूल्यमापन केलं गेलं.
पूर्वी विद्यार्थ्यांना निकालासाठी खूप दिवस वाट बघावी लागायची, पण आता विद्यापीठानं ही प्रक्रिया झपाट्यानं करून विद्यार्थ्यांना वेळेत निकाल देण्यावर भर दिला आहे.
Comments are closed.