‘मुख्यमंत्री माझी लाडकी बहीण’ ही योजना राज्यातील आर्थिकदृष्ट्या दुर्बल महिलांसाठी मोठा आधार ठरत आहे. २१ ते ६५ वयोगटातील पात्र महिलांना दर महिन्याला १५०० रुपयांची आर्थिक मदत या योजनेतून दिली जाते. गेल्या १२ महिन्यांत योजनेचे १२ हप्ते पात्र महिलांच्या खात्यात जमा झाले असून, आता १३ व्या हप्त्याची म्हणजेच जुलै २०२५ च्या हप्त्याची वाट पाहिली जात आहे.
जुलै हप्त्याबाबत नवा अपडेट!
जुलै २०२५ महिना संपण्यास आता काहीच दिवस शिल्लक असताना अनेक महिलांमध्ये हप्त्याबाबत उत्सुकता आहे. अद्याप सरकारकडून अधिकृत घोषणा न झाल्याने महिलांमध्ये संभ्रम आहे. मात्र, मीडिया रिपोर्ट्सनुसार जुलैचा हप्ता महिन्याच्या अखेरीस म्हणजे २५ ते ३१ जुलैदरम्यान खात्यात जमा होण्याची शक्यता आहे. त्यामुळे महिना संपण्यापूर्वीच महिलांना दिलासा मिळू शकतो.
लाभार्थींनी आधी मिळवलेले हप्ते
या योजनेअंतर्गत महिलांना जुलै २०२४ पासून जून २०२५ पर्यंतचे १२ हप्ते मिळाले आहेत. यामध्ये ऑगस्ट, सप्टेंबर, ऑक्टोबर, नोव्हेंबर, डिसेंबर २०२४ व जानेवारी ते जून २०२५ असे हप्ते वेळच्यावेळी जमा करण्यात आले. त्यामुळे जुलै हप्ताही वेळेवर मिळेल अशी अपेक्षा महिलांमध्ये आहे.
कोणता गट होणार अपात्र?
सर्व महिला या योजनेसाठी पात्र नसतात. वय २१ पेक्षा कमी व ६५ पेक्षा जास्त असलेल्या महिलांना लाभ मिळणार नाही. तसेच ज्या कुटुंबाचे वार्षिक उत्पन्न अडीच लाखांहून अधिक आहे, त्यांनाही या योजनेचा लाभ मिळणार नाही. सरकारी नोकरी, आयकर भरणारे सदस्य किंवा घरात चारचाकी असणाऱ्या कुटुंबातील महिलाही वगळल्या जात आहेत.
एकाच कुटुंबातील २ पेक्षा जास्त महिलांना नाही लाभ
ज्या कुटुंबातून आधीच २ महिलांना लाभ मिळतोय, तिथे तिसऱ्या किंवा इतर महिलांना या योजनेत समाविष्ट करता येणार नाही. सरकारचा उद्देश अधिकाधिक गरजूंना मदत मिळावी हा आहे, त्यामुळे निकष अधिक काटेकोर करण्यात आले आहेत.
संजय गांधी योजनेचे लाभार्थी महिलाही अपात्र
जे लाभार्थी आधीच संजय गांधी निराधार योजना किंवा तत्सम आर्थिक योजनेचा लाभ घेत आहेत, त्यांना ‘लाडकी बहीण’ योजनेतून वगळण्यात आले आहे. ही यादी अद्यतनित करताना शासनाने डुप्लिकेट लाभ टाळण्याची भूमिका घेतली आहे.
राज्याबाहेरील व राजकीय कुटुंबांतील महिलांना नाही हक्क
या योजनेचा लाभ केवळ महाराष्ट्रात राहणाऱ्या महिलांनाच दिला जातो. तसेच ज्या महिलांचा संबंध माजी किंवा सध्या कार्यरत असलेल्या आमदार, खासदारांच्या कुटुंबाशी आहे, त्यांनाही योजनेपासून वगळण्यात आले आहे.
सरकारकडून अधिकृत घोषणा अपेक्षित
सध्या जुलै हप्त्याबाबतची अधिकृत घोषणा सरकारकडून झालेली नाही, मात्र परिस्थिती पाहता शेवटच्या आठवड्यात हप्ता जमा होण्याची शक्यता जास्त आहे. महिलांनी आपला DBT स्टेटस, बँक खाते आणि लाभार्थी क्रमांक अपडेट ठेवावा, जेणेकरून हप्ता वेळेवर मिळवता येईल.
Comments are closed.