कवयित्री बहिणाबाई चौधरी उत्तर महाराष्ट्र विद्यापीठात विद्यार्थ्यांच्या शिक्षणातून थेट रोजगाराकडे प्रवास सुलभ व्हावा, यासाठी भारतीय उद्योग महासंघाच्या (CII) सहकार्याने ‘एज्युकेशन टू एम्प्लॉयमेंट करिअर लाउंज’ हा महत्त्वपूर्ण उपक्रम राबविण्यात येणार आहे. या उपक्रमासाठी शुक्रवारी विद्यापीठाचे कुलगुरू प्रा. व्ही. एल. माहेश्वरी यांच्या उपस्थितीत इरादा पत्र (Letter of Intent) वर स्वाक्षरी करण्यात आली.
या उपक्रमाचे मुख्य उद्दिष्ट म्हणजे विद्यार्थ्यांना शिक्षणासोबतच उद्योगातील गरजांनुसार व्यावसायिक कौशल्य मिळवून देणे. हे करिअर लाउंज शिक्षण आणि रोजगार यामधील अंतर भरून काढण्याचे प्रभावी माध्यम ठरणार आहे. यामुळे विद्यार्थ्यांचा ‘डिग्री’ घेतल्यावर बेरोजगारीकडे जाणारा प्रवास थांबेल आणि तो थेट उद्योगजगतातील संधींकडे वळेल.
या स्वाक्षरी प्रसंगी प्र-कुलगुरू प्रा. एस. टी. इंगळे, कुलसचिव डॉ. विनोद पाटील, प्लेसमेंट समन्वयक प्रा. उज्वल पाटील, प्रा. रामेश्वर चव्हाण, प्लेसमेंट ऑफिसर सोनाली दायमा, तसेच आंतरवासिता समन्वयक संदीपकुमार आदी मान्यवर उपस्थित होते. या सर्वांनी उपक्रमाच्या यशस्वी अंमलबजावणीसाठी सहकार्याचे आश्वासन दिले.
२ जुलै रोजी भारतीय उद्योग महासंघाचे कौशल्य विकास विभागाचे व्यवस्थापक गौरव मिश्रा यांनी विद्यापीठास भेट देऊन, लाउंजच्या स्थापनेसाठी आवश्यक सुविधांचा आढावा घेतला. ही तयारी दर्शवते की विद्यापीठ रोजगारक्षम शिक्षणाची दिशा अधिक ठामपणे स्वीकारत आहे.
या कार्यक्रमांतर्गत काय असणार? विद्यार्थ्यांना व्यावसायिक प्रशिक्षण, करिअर मार्गदर्शन, कार्यशाळा, इंडस्ट्री लिंक्ड कोर्सेस, ऑन-जॉब ट्रेनिंग, इंटर्नशिप, अप्रेंटिसशिप आदी सुविधा मिळणार आहेत. तसेच रोजगारक्षमतेवर केंद्रित कार्यशाळा उद्योगतज्ज्ञांनी घेतल्या जाणार असून, फायदेशीर आणि थेट उद्योगजगतात वापरल्या जाणाऱ्या कौशल्यांचे प्रशिक्षण दिले जाणार आहे.
हा उपक्रम फक्त नोकरी मिळवण्यासाठी नसून, विद्यार्थ्यांचे करिअर दीर्घकालीन दृष्टीने घडवणे, त्यांना योग्य दिशा दाखवणे, स्पर्धात्मकतेत टिकून राहण्यासाठी सज्ज करणे हे मुख्य ध्येय असणार आहे. हे लाउंज विद्यार्थ्यांच्या कौशल्य विकासासाठी एक व्यासपीठ ठरणार असून, विद्यापीठ-उद्योग भागीदारीचा आदर्श उदाहरण म्हणून समोर येईल.
विद्यापीठात राबविण्यात येणाऱ्या या उपक्रमामुळे उत्तर महाराष्ट्रातील विद्यार्थ्यांना घरबसल्या उच्च दर्जाचे उद्योगाभिमुख प्रशिक्षण, मार्गदर्शन आणि संधी मिळणार आहेत. त्यामुळे शिक्षण घेत असतानाच रोजगारसिद्धतेकडे वाटचाल करण्याचा मार्ग खुला होणार आहे. हे लाउंज विद्यार्थ्यांच्या करिअरमधील दिशाहीनतेला पूर्णविराम देणारे ठरण्याची शक्यता आहे.
