राज्यातील प्राथमिक, माध्यमिक आणि खासगी शाळांमध्ये शिक्षकांसाठी राज्य सरकारने मोठा निर्णय घेतला आहे. शिक्षक संघटनांनी नवीन संचमान्यता धोरणाला विरोध केल्यानंतर, सहावी ते आठवीच्या २० पेक्षा कमी पटसंख्येच्या वर्गांना एक पदवीधर शिक्षक देण्याचा आदेश देण्यात आला आहे. मात्र, दोन शिक्षक देण्याच्या मागणीवर संघटना ठाम आहेत.
या निर्णयानुसार, २० पेक्षा कमी पटसंख्येच्या उच्च प्राथमिक वर्गाला फक्त एकच शिक्षक मिळणार आहे. त्यामुळे अनेक शाळांमधून दुसरा शिक्षक अतिरिक्त ठरणार आहे. हा आदेश ग्रामीण भागातील शाळांसाठी अडचण निर्माण करणारा असल्याची शिक्षक संघटनांची तक्रार आहे.
शिक्षक भरती आणि संचमान्यता:
- १ ते २० पटसंख्येच्या शाळांसाठी एक शिक्षक अनिवार्य.
- दुसऱ्या शिक्षकाची नियुक्ती गरजेनुसार सेवानिवृत्त शिक्षकांच्या माध्यमातून होणार.
- राज्यात ६ हजार शाळा १० पेक्षा कमी पटसंख्येच्या आहेत, त्यामुळे त्या शिक्षकाविना राहण्याची शक्यता आहे.
नवीन धोरणामुळे काही शाळा बंद होण्याचा धोका निर्माण झाला असून, संपूर्ण धोरण रद्द करण्याची शिक्षक संघटनांची मागणी आहे.
