राज्य शासनाने जाहीर केलेल्या पुण्यश्लोक अहिल्यादेवी होळकर शेतकरी कर्जमाफी योजनेअंतर्गत कोल्हापूर जिल्ह्यातील सुमारे दोन लाख शेतकऱ्यांना तब्बल ८०० कोटी रुपयांचे प्रोत्साहन अनुदान मिळण्याची शक्यता व्यक्त केली जात आहे. या योजनेमुळे कर्जबाजारी शेतकऱ्यांना मोठा दिलासा मिळणार असून, नियमित कर्जफेड करणाऱ्या शेतकऱ्यांनाही शासनाकडून प्रोत्साहनपर मदत दिली जाणार आहे.
सप्टेंबर २०२५ अखेरपर्यंत दोन लाख रुपयांपर्यंत थकीत कर्ज असलेल्या ३८ हजार ३५८ शेतकऱ्यांकडे २०९.८९ कोटी रुपयांची थकबाकी असल्याची माहिती समोर आली आहे. मात्र कर्जमाफीसाठीचे अंतिम निकष अद्याप निश्चित करण्यात आलेले नसले तरी सप्टेंबर २०२५ पर्यंतचे थकीत कर्ज माफ करण्याचा निर्णय शासनाने घेतला आहे. या प्रक्रियेसाठी महाआयटीच्या माध्यमातून विशेष पोर्टल तयार करण्यात येणार असून, त्याद्वारे संबंधित माहिती भरण्याच्या सूचना जिल्हा बँकेला देण्यात आल्या आहेत.
दरम्यान, शासनाने दोन लाख रुपयांपर्यंतचे थकीत कर्ज माफ करण्याचा निर्णय घेतला असून, नियमितपणे कर्जफेड करणाऱ्या शेतकऱ्यांना ५० हजार रुपयांचे प्रोत्साहन अनुदान देण्याची तरतूदही करण्यात आली आहे. जिल्हा बँकेकडे जवळपास दोन लाख खातेदार असून, त्यांच्या कर्जफेडीच्या आकडेवारीनुसार एकूण ८०० कोटी रुपयांपर्यंतचे अनुदान वितरित होऊ शकते, असा अंदाज वर्तवण्यात येत आहे.
मार्च २०२५ अखेरच्या आकडेवारीनुसार २ लाखांपर्यंत पीक कर्ज असलेले ४३,८०८ शेतकरी असून त्यांच्यावर २४०.२९ कोटी रुपयांचे कर्ज होते. तर सप्टेंबर २०२५ अखेर ही संख्या ३८,३५८ शेतकरी आणि २०९.८९ कोटी रुपये इतकी झाली आहे.
याशिवाय २ लाखांवरील कर्ज असलेल्या शेतकऱ्यांची संख्या मार्चमध्ये ३,९५० होती, ज्यांच्यावर १४९.९८ कोटी रुपये कर्ज होते; सप्टेंबर २०२५ अखेर ही संख्या ३,५५२ शेतकरी आणि १३६.१४ कोटी रुपये कर्ज इतकी झाली आहे. एकूण पाहता मार्च २०२५ अखेर ४७,७५८ शेतकऱ्यांवर ३९०.२७ कोटी रुपयांचे कर्ज होते, तर सप्टेंबर २०२५ अखेर ४१,९१० शेतकरी आणि ३४६.०२ कोटी रुपयांचे कर्ज असल्याची नोंद आहे.
या योजनेमुळे कोल्हापूर जिल्ह्यातील हजारो शेतकऱ्यांना आर्थिक दिलासा मिळण्याची अपेक्षा व्यक्त केली जात असून, कर्जमाफी आणि प्रोत्साहन अनुदानामुळे शेती अर्थव्यवस्थेला देखील मोठी चालना मिळेल, अशी आशा व्यक्त केली जात आहे.
Comments are closed.