पालिका रुग्णालयांमध्ये आता रुग्णांना पूर्णपणे निःशुल्क वैद्यकीय उपचार मिळतील, ही मोठी घोषणा करण्यात आली आहे. महात्मा जोतिबा फुले जनआरोग्य योजना (एमजेपीजेएवाय) आणि आयुष्मान भारत पीएम जनआरोग्य योजना (एबीपीएमजेएवाय) अंतर्गत पाच लाखांपर्यंतचे उपचार मोफत होत आहे.
तरी त्यापुढील खर्च रुग्णांना सहन करावा लागायचा. हा आर्थिक ताण कमी करण्यासाठी मुंबई महानगरपालिकेने ‘इंटिग्रेटेड पेशंट्स हेल्थकेअर स्कीम’ (इफ्सा) सुरू केली आहे.
ही प्रणाली दारिद्रयरेषेखालील गंभीर आजार असलेल्या रुग्णांसाठी लागू केली जाईल. चार क्षेत्रांमध्ये रुग्णालयांची विभागणी केली असून, केईएम, नायर, पूर्व व पश्चिम उपनगरांतील रुग्णालये तसेच थैलेसेमिया केंद्रांचा समावेश आहे.
इफ्सा अंतर्गत राष्ट्रीय आरोग्य निधी, आरोग्यमंत्री अनुदान आणि केंद्र सरकारच्या विविध योजनांचा निधी वापरून, पाच लाखांपेक्षा जास्त खर्चाचे उपचार देखील रुग्णांसाठी विनामूल्य करता येणार आहेत. रुग्णालयांमध्ये ट्रॉमा सेंटर, प्रसूतिगृहे, दवाखाने, पॉलिक्लिनिक आणि शिवयोग केंद्रांचा समावेश असेल.
उपचार प्रक्रियेत रुग्णाची नोंदणी, खर्चाचा प्रस्ताव तयार करणे, समितीकडे मान्यता घेणे व केंद्राला पाठविणे यांचा समावेश असेल. रुग्णांना सीटी-स्कॅन, एमआरआय किंवा औषधांसाठी बाहेरून पैसे खर्च करावे लागल्यास, निधी आल्यानंतर त्यांचे पैसे परत मिळतील.
मुख्यमंत्री देवेंद्र फडणवीस यांनी या योजनेत आरोग्यसेवेची कमाल मर्यादा वाढवण्याची घोषणा केली असून, इफ्सा प्रणाली राबवल्याने रुग्णांना गुणवत्ता आणि सुविधा सुनिश्चित करता येणार आहेत. या माध्यमातून पालिकेच्या आरोग्यसेवेचे बळकटीकरण व मोठ्या प्रमाणात निधी उपलब्ध होईल, असा विश्वास पालिका प्रशासनाने व्यक्त केला आहे.
Comments are closed.