देशातील आघाडीची आयटी कंपनी विप्रोने कर्मचाऱ्यांच्या कामकाज पद्धतीत मोठा बदल करत १ जानेवारी २०२६ पासून नवीन ऑफिस नियम लागू करण्याचा निर्णय घेतला आहे. या नव्या धोरणानुसार, ज्या दिवशी कर्मचाऱ्यांना प्रत्यक्ष कार्यालयात बोलावले जाईल, त्या दिवशी किमान ६ तास ऑफिसमध्ये उपस्थित राहणे बंधनकारक असेल.
हा नियम विप्रोच्या हायब्रीड वर्क मॉडेलचा भाग असून, कामातील शिस्त, समन्वय आणि उत्पादकता वाढवणे हा त्यामागचा मुख्य उद्देश असल्याचे कंपनीने स्पष्ट केले आहे. कर्मचाऱ्यांनी आठवड्यातून किमान तीन दिवस ऑफिसला येणे ही अट पूर्वीप्रमाणे कायम राहणार आहे; मात्र आता त्या दिवसांतील नेमके ऑफिस तास ठरवून दिले आहेत.
कंपनीने सांगितले की, ६ तासांची गणना कर्मचाऱ्यांनी ॲपवर हजेरी लावल्यापासून ते ऑफिसमधून बाहेर पडण्यापर्यंत केली जाईल. एकूण कामाचा दिवस मात्र अजूनही ९.५ तासांचाच राहणार आहे. ऑफिसमधील ६ तास पूर्ण केल्यानंतर उर्वरित काम कर्मचारी घरून किंवा इतर ठिकाणाहून करू शकतात, पण काम पूर्ण करणे आवश्यक असेल.
नव्या धोरणानुसार, ठरलेल्या दिवशी ६ तासांची ऑफिस उपस्थिती पूर्ण न झाल्यास कर्मचाऱ्यांच्या सुट्ट्यांमधून अर्ध्या दिवसाची कपात होऊ शकते. वारंवार नियमभंग झाल्यास अधिक सुट्ट्या कापल्या जाण्याचीही शक्यता कंपनीने नमूद केली आहे.
याशिवाय, २०२४ मध्ये दिलेली वर्षाला ३० दिवसांची ‘वर्क फ्रॉम होम’ विशेष सवलत आता २०२६ पासून फक्त १२ दिवसांपर्यंत मर्यादित करण्यात आली आहे.
विप्रोचा हा निर्णय भारतीय आयटी क्षेत्रातील बदलत्या कार्यसंस्कृतीकडे निर्देश करणारा मानला जात असून, हायब्रीड काम सुरू ठेवत असतानाही कार्यालयीन उपस्थितीला अधिक महत्त्व दिले जात असल्याचे चित्र दिसत आहे.
Comments are closed.