डॉ. बाबासाहेब आंबेडकर मराठवाडा विद्यापीठाच्या पदवी अभ्यासक्रमांच्या परीक्षा आज, म्हणजेच १२ नोव्हेंबरपासून सुरू होत आहेत. पहिल्या टप्प्यात पॅटर्न-२०१३ अंतर्गत विद्यार्थ्यांची परीक्षा होणार असून, नवीन शैक्षणिक धोरण (NEP) अंतर्गत अभ्यासक्रमांच्या परीक्षा १८ नोव्हेंबरपासून घेतल्या जाणार आहेत.
या परीक्षेसाठी एकूण २३३ परीक्षा केंद्रांवर सुमारे ३ लाख ५९ हजार विद्यार्थी बसणार आहेत. परीक्षा प्रामाणिकपणे पार पाडण्यासाठी ३२ भरारी पथकांची नेमणूक करण्यात आली आहे. तसेच, नगरपालिका व नगरपंचायत निवडणुकांच्या पार्श्वभूमीवर १ आणि २ डिसेंबर रोजी परीक्षांना सुट्टी जाहीर करण्यात आली आहे.
विद्यापीठाच्या परीक्षा व मूल्यमापन मंडळाने बैठकीनंतर वेळापत्रक अंतिम केले आहे. बी.ए., बी.एस्सी., बी.कॉमसह एकूण ३२ अभ्यासक्रमांच्या परीक्षा आजपासून सुरू होत आहेत. छत्रपती संभाजीनगर जिल्ह्यात ९० केंद्रे, जालना ५२, बीड ६५, आणि धाराशीव २४ केंद्रांवर परीक्षा पार पडणार आहेत.
तर एम.ए., एम.एस्सी., एम.कॉम आणि इतर परंपरागत पदव्युत्तर अभ्यासक्रमांच्या परीक्षा २५ नोव्हेंबरपासून होणार आहेत. अभियांत्रिकी व व्यावसायिक अभ्यासक्रमांच्या परीक्षा मात्र जानेवारी २०२६ मध्ये घेतल्या जाणार आहेत. याशिवाय पर्यावरणशास्त्र (EVS) आणि भारतीय संविधान या विषयांच्या परीक्षा २३ नोव्हेंबर रोजी घेण्यात येणार आहेत.
परीक्षा विभागाकडून सर्व केंद्रांवरील तयारी पूर्ण असल्याचे कळविण्यात आले असून, विद्यार्थ्यांनी वेळापत्रकानुसार परीक्षा केंद्रांवर उपस्थित राहण्याचे आवाहन करण्यात आले आहे.
Comments are closed.