कागदी रेशन कार्ड वारंवार फाटणे, खराब होणे किंवा सांभाळताना होणारा त्रास आता संपणार आहे. शिधापत्रिकाधारकांसाठी आता रेशन कार्ड PVC म्हणजेच ATMसारख्या प्लास्टिक कार्डमध्ये तयार करण्याचा सोपा पर्याय उपलब्ध झाला आहे. यामुळे रेशन कार्ड अधिक टिकाऊ, सुरक्षित आणि वापरण्यास सोयीचे ठरणार आहे.
केंद्र सरकारच्या ‘मेरा रेशन’ या अधिकृत अॅपच्या मदतीने नागरिक आपले डिजिटल किंवा ई-रेशन कार्ड सहज पाहू व डाउनलोड करू शकतात. या अॅपमध्ये रेशन कार्डधारकाची तसेच कुटुंबातील सर्व सदस्यांची माहिती उपलब्ध असते. एकदा ई-रेशन कार्ड डाउनलोड केल्यानंतर, ते जवळच्या PVC कार्ड प्रिंटिंग सेंटरमध्ये नेऊन ATM कार्डसारख्या PVC कार्डवर प्रिंट करून घेता येते.
यासाठी सर्वप्रथम मोबाईलमध्ये ‘मेरा रेशन’ अॅप इन्स्टॉल करून आधार क्रमांक व OTPच्या सहाय्याने लॉगिन करावे लागते. लॉगिन झाल्यानंतर अॅपच्या होम स्क्रीनवरच ई-रेशन कार्ड दिसते, जे PDF स्वरूपात डाउनलोड करता येते.
महत्त्वाचे म्हणजे, सरकारकडून थेट PVC कार्ड दिले जात नसले तरी, डाउनलोड केलेले ई-रेशन कार्ड PVC कार्डवर प्रिंट करण्याची मुभा आहे. त्यामुळे आता रेशन कार्ड फाटण्याची किंवा हरवण्याची भीती न ठेवता, ते सुरक्षितपणे खिशात ठेवता येणार आहे.
Comments are closed.