गुरुजी म्हणजे समाजाचे सच्चे शिल्पकार! त्यांच्या घडवलेल्या पिढ्यांनी देश घडवला. ह्या शिक्षकांचं मान ठेवत अहिल्यानगरचे खासदार निलेश लंके यांनी २०० निवृत्त शिक्षकांना संसददर्शनाची सहल घडवली.
१९ जुलैला हे सर्व गुरुजन रेल्वेनं दिल्लीला रवाना झाले, आणि विशेष म्हणजे खुद्द लंके साहेबही त्यांच्यासोबत ट्रेननं प्रवास करत होते. दिल्लीत पोहचल्यावर त्यांनी आधी अक्षरधाम, मग दुसऱ्या दिवशी लाल किल्ल्याचं दर्शन घेतलं.
ज्या गोष्टी त्यांनी वर्षानुवर्षं विद्यार्थ्यांना शिकवल्या, त्या प्रत्यक्ष डोळ्यांनी पाहून गुरुजींच्या डोळ्यात आनंदाश्रू होते. लाल किल्ल्याच्या भिंतींमध्ये त्यांना इतिहास जिवंत वाटला.
पण या सहलीचा खरा शिखरबिंदू म्हणजे – संसद भवन भेट!
पावसाळी अधिवेशनाच्या पहिल्याच दिवशी गुरुजी संसदेत गेले. लोकसभा-राज्यसभेचं कामकाज पाहिलं. मंत्र्यांच्या भाषणांपासून ते प्रश्नोत्तर सत्रांपर्यंत सर्व काही पाहून शिक्षक भारावून गेले.
यावेळी खासदार लंके यांनी या गुरुजनांचा संसदेत औपचारिक परिचय करून दिला आणि लोकशाही प्रक्रियेचा प्रत्यक्ष अभ्यास करण्याची संधी दिली. अनेकांनी प्रश्न विचारून समाधानही मिळवलं.
Comments are closed.