टाटा कन्सल्टन्सी सर्व्हिसेस (TCS) ही देशातील सर्वात मोठी IT कंपनी आता मोठ्या प्रमाणावर कर्मचार्‍यांची कपात करणार आहे. कंपनीच्या सुमारे 6 लाख कर्मचाऱ्यांमधून जवळपास 12,000 कर्मचाऱ्यांना कामावरून कमी करण्याचा निर्णय घेतला आहे, म्हणजेच जवळपास 2% कर्मचार्‍यांवर गाडं येणार आहे.
ही कपात मुख्यतः मध्यम व वरिष्ठ स्तरावरील कर्मचाऱ्यांमध्ये होणार आहे. AI (कृत्रिम बुद्धिमत्ता) आणि ऑटोमेशनमुळे अनेक पारंपरिक कामे संपुष्टात येत असून त्यामुळेच कंपन्या आता नव्या कौशल्यांकडे वळत आहेत. याच पार्श्वभूमीवर TCS ने वार्षिक वेतनवाढ थांबवली असून नवीन अनुभवी कर्मचाऱ्यांची भरतीही थांबवली आहे.
TCS च्या धोरणानुसार, जे कर्मचारी ‘बेंच’वर आहेत – म्हणजे सध्या कोणत्याही प्रोजेक्टवर काम करत नाहीत – त्यांनी 35 दिवसांच्या आत नवीन प्रोजेक्ट मिळवला नाही, तर त्यांना कंपनी सोडावी लागणार आहे. या धोरणामुळे आधीच हैदराबाद, पुणे, चेन्नई आणि कोलकाता येथील अनेक कर्मचाऱ्यांना बाहेरचा रस्ता दाखवण्यात आला आहे. याशिवाय, कंपनीने ऑपरेशनल खर्च कमी करण्यासाठी मोठी मोहीम सुरू केली असून दरवर्षी 300–400 दशलक्ष डॉलर म्हणजेच सुमारे 2,400 ते 3,600 कोटी रुपयांची बचत होण्याची शक्यता आहे.
AI आणि ऑटोमेशनमुळे आयटी क्षेत्राचा पारंपरिक पिरॅमिड स्ट्रक्चर बदलतो आहे. पूर्वी केवळ कनिष्ठ स्तरावर कपात होत असे, पण आता मधल्या स्तरावरही परिणाम होतोय. यामुळे कर्मचाऱ्यांमध्ये मोठी असुरक्षितता निर्माण झाली आहे. कामगार संघटना NITES ने या निर्णयाला बेकायदेशीर ठरवत सरकारकडे तक्रार केली आहे. दरम्यान, TCS चा शेअर मागील वर्षभरात जवळपास 30% नी घसरलेला असून, IT क्षेत्रात ही एक मोठी झळ मानली जात आहे.
एकंदरीत, ही कपात फक्त एक कंपनीपुरती मर्यादित राहणार नाही, तर AI च्या प्रभावामुळे येत्या काळात अनेक आयटी कंपन्या अशाच निर्णयांकडे वळतील, अशी शक्यता व्यक्त केली जाते.
Comments are closed.