भारतातील सर्वात मोठ्या IT कंपनी TCS ने ८०,००० कर्मचाऱ्यांना कामावरून काढण्याचा दावाही केला जात आहे, ज्यामुळे IT क्षेत्रात मोठी खळबळ उडाली आहे. कंपनीच्या अधिकृत निवेदनानुसार फक्त २ टक्के म्हणजे सुमारे १२,००० कर्मचाऱ्यांना नोकरीतून काढले जाऊ शकते, पण काही अहवालांनुसार प्रत्यक्षात ३०,००० पेक्षा जास्त कर्मचाऱ्यांची नोकरी जाऊ शकते.
पुण्यातील एका कर्मचाऱ्याने, ज्याचं नाव न सांगण्याची अट होती, सांगितलं की, १३ वर्षे TCS मध्ये काम केल्यानंतर त्याला राजीनामा देण्यास भाग पाडण्यात आले. त्याचा प्रोजेक्ट संपल्यावर दुसरा प्रोजेक्ट दिला गेला नाही. एचआर आणि आरएमजीकडून वारंवार चौकशी केली, पण प्रतिसाद न मिळाल्याने त्याच्यावर दुसऱ्या कंपनीत काम केल्याचा खोटा आरोपही करण्यात आला. नकार दिल्यानंतर त्याला कामावरून काढले गेले.
काही कर्मचाऱ्यांनी स्पष्ट केले की कंपनीमध्ये “फ्लुइडीटी लिस्ट” तयार केली जाते, ज्यात काढून टाकल्या जाणाऱ्यांची नावे असतात. ही यादी कौशल्यावर किंवा अनुभवावर आधारित नसते. यादीत नाव आलेल्या कर्मचाऱ्यांना कितीही मेहनत केली तरी प्रकल्प मिळत नाही आणि एचआर त्यांना स्वतःहून राजीनामा देण्यास भाग पाडतो.
FITE, UNITE आणि AIITEU सारख्या IT संघटनांनी उघडपणे असा दावा केला आहे की TCS कर्मचाऱ्यांना अन्याय्यपणे काढून टाकत आहे. FITE सचिव प्रशांत पंडित यांनी सांगितले की निवृत्तीच्या जवळ असलेल्या ३०–३५ वर्षांच्या कर्मचाऱ्यांना अवघ्या ३० मिनिटांत काढले जात आहे. UNITEचे सरचिटणीस अलागुनाम्बी वेलकिन यांनी म्हटले की प्रकल्प असलेल्या कर्मचाऱ्यांना बेंचवर ठेवून त्यांना नवीन प्रकल्पात सामील होण्यास नकार दिला जातो.
जून २०२५ मध्ये, TCS ने नवीन धोरण लागू केले आहे, ज्यामध्ये प्रत्येक कर्मचाऱ्याला वर्षभरात किमान २२५ दिवस प्रकल्पात सक्रिय राहणे आवश्यक आहे. तसे न केल्यास नोकरीवर परिणाम होईल. तसेच, कर्मचारी आता ३५ दिवसांपेक्षा जास्त काळ बेंचवर राहू शकत नाहीत.
टीसीएसने अद्याप या विषयावर अधिकृत निवेदन दिलेले नाही, सर्वांचे लक्ष आता ९ ऑक्टोबरकडे आहे, जेव्हा कंपनी तिचे तिमाही निकाल जाहीर करेल आणि या वादाला उघडपणे सामोरे जाईल.
Comments are closed.