Tata Consultancy Services (TCS) मधील सुमारे ३० हजार कर्मचाऱ्यांच्या नोकरकपातीमागे कृत्रिम बुद्धिमत्ता (AI) कारणीभूत असल्याची चर्चा रंगत असताना Tata Sons चे अध्यक्ष Natarajan Chandrasekaran यांनी याबाबत स्पष्ट भूमिका मांडली आहे.
गेल्या सहा महिन्यांत झालेल्या नोकरकपातीचा एआयशी कोणताही संबंध नसल्याचे त्यांनी ठामपणे सांगितले. एआय इंडिया इम्पॅक्ट समिट २०२६ दरम्यान माध्यमांशी संवाद साधताना त्यांनी म्हटले की, “टीसीएसने याबाबत आधीच स्पष्टीकरण दिले आहे. नोकरकपात आणि एआय यांचा परस्पर संबंध नाही. चर्चांना उधाण येईल, पण वस्तुस्थिती वेगळी आहे.”
चंद्रशेखरन यांनी पंतप्रधान Narendra Modi यांच्या ‘मानवकेंद्रित एआय’ या दृष्टिकोनाचे समर्थन करत एआयमुळे मानवी क्षमतांना मोठी चालना मिळेल, असा विश्वास व्यक्त केला. त्यांनी उदाहरण देताना आशा वर्कर्सच्या कामातील बदल अधोरेखित केला.
पूर्वी केवळ डेटा संकलन करणाऱ्या आशा वर्कर्स आता एआयच्या मदतीने अधिक गुणवत्तापूर्ण आणि प्रभावी सेवा देत असल्याचे त्यांनी नमूद केले. एआयमुळे काम करण्यासाठी लागणारा अतिरिक्त प्रयत्न कमी होतो आणि उच्च दर्जाची कामगिरी शक्य होते, असेही ते म्हणाले.
दरम्यान, टीसीएसचे मुख्य कार्यकारी अधिकारी K Krithivasan यांनीही एआयमुळे आयटी क्षेत्रातील संधी कमी न होता उलट वाढत असल्याचे स्पष्ट केले. पायाभूत सुविधा, मॉडेल्स आणि अॅप्लिकेशन्समध्ये वाढती गुंतवणूक होत असून एआयमुळे विस्ताराच्या नव्या शक्यता निर्माण होत आहेत.
तांत्रिक बदलांची भीती बाळगण्याची गरज नसून प्रत्येक तांत्रिक परिवर्तनानंतर कामाच्या संधी अधिक विस्तारतात, असे त्यांनी सांगितले. त्यामुळे एआयमुळे मोठ्या प्रमाणात नोकऱ्या जाणार ही भीती निराधार असल्याचा संदेश टाटा समूहाच्या वरिष्ठ नेतृत्वाने दिला आहे.
Comments are closed.