राज्य परिवहन महामंडळातील कर्मचाऱ्यांसाठी अखेर चांगली बातमी आली आहे. गेल्या काही दिवसांपासून पगार न मिळाल्याने चिंतेत असलेल्या एसटी कर्मचाऱ्यांच्या खात्यात आज म्हणजेच १० नोव्हेंबर रोजी पगार जमा होणार आहे. राज्य सरकारने सवलत मूल्य प्रतिपूर्ती म्हणून ४७१ कोटी ५ लाख रुपयांचा निधी एसटी महामंडळाला वितरित केला आहे.
गेल्या महिन्याच्या शेवटीपर्यंत एसटी महामंडळाकडे निधीअभावी मोठी आर्थिक तूट निर्माण झाली होती. त्यामुळे ऑक्टोबर महिन्याचा पगार ७ नोव्हेंबरला देणे शक्य झाले नाही. मात्र आता शासन निर्णय प्रसिद्ध झाल्यानंतर निधीची रक्कम महामंडळाच्या खात्यात येणार असल्याने कर्मचाऱ्यांना थोडा दिलासा मिळाला आहे.
दरम्यान, दिवाळीच्या काळात अपेक्षेप्रमाणे महसूल मिळेल, अशी अपेक्षा होती. परंतु गाड्यांची कमतरता, नियोजनाचा अभाव आणि वरिष्ठ अधिकाऱ्यांचे दुर्लक्ष यामुळे प्रवाशांची गर्दी असूनही अपेक्षित महसूल मिळू शकला नाही. त्यामुळे महामंडळाचे उत्पन्न घटले आणि पगाराच्या निधीत अडचण निर्माण झाली.
महामंडळाच्या सूत्रांच्या माहितीनुसार, सरकारकडून प्राप्त झालेला निधी तातडीने कर्मचाऱ्यांच्या पगारासाठी वापरण्यात येणार आहे. आज संध्याकाळपर्यंत सर्व कर्मचाऱ्यांच्या बँक खात्यात पगार जमा होईल, अशी माहिती मिळाली आहे.
एसटी कर्मचाऱ्यांच्या संघटनांनी याबाबत सरकारकडे मागणी केली होती की, कर्मचाऱ्यांचा पगार वेळेवर देणे ही शासनाची जबाबदारी आहे. अखेर शासनाने तत्परतेने निधी वितरित करून कर्मचाऱ्यांना दिलासा दिला आहे. यामुळे अनेक कर्मचाऱ्यांच्या घरात आज पुन्हा आनंदाचे वातावरण निर्माण झाले आहे.
Comments are closed.