Dr. Babasaheb Ambedkar Marathwada Universityच्या पदवी आणि पदव्युत्तर अभ्यासक्रमांच्या नोव्हेंबर-डिसेंबर सत्र परीक्षांचे निकाल जाहीर करण्याची प्रक्रिया अद्याप पूर्ण झालेली नाही. विद्यापीठ प्रशासनाच्या माहितीनुसार एकूण १२६ अभ्यासक्रमांच्या परीक्षा घेण्यात आल्या असून त्यापैकी ११९ अभ्यासक्रमांचे निकाल जाहीर झाले आहेत.
१०८ अभ्यासक्रमांचे निकाल ३० दिवसांच्या आत तर ११ अभ्यासक्रमांचे निकाल ४५ दिवसांत प्रसिद्ध करण्यात आल्याचा दावा करण्यात आला आहे. मात्र अद्याप सात अभ्यासक्रमांचे निकाल प्रलंबित असल्याने विद्यार्थ्यांमध्ये नाराजी व्यक्त होत आहे.
या सत्रातील पदवी अभ्यासक्रमांच्या परीक्षा १२ नोव्हेंबर २०२५ पासून तर पदव्युत्तर अभ्यासक्रमांच्या परीक्षा २४ नोव्हेंबरपासून सुरू झाल्या होत्या आणि १९ डिसेंबरपर्यंत त्या पार पडल्या. त्यानंतर अभियांत्रिकी आणि इतर व्यावसायिक अभ्यासक्रमांच्या परीक्षाही घेण्यात आल्या.
या सत्रात एकूण सुमारे २ लाख ८३ हजार विद्यार्थ्यांनी परीक्षा दिली असून त्यापैकी सुमारे ८७ हजार विद्यार्थ्यांनी ‘होम सेंटर’ पद्धतीने परीक्षा दिली. पदवी अभ्यासक्रमातील जवळपास १.३० लाख विद्यार्थी आणि एमए, एमएस्सी, एमकॉम अशा पदव्युत्तर अभ्यासक्रमांतील ५७ हजारांहून अधिक विद्यार्थ्यांनी परीक्षा दिली होती.
दरम्यान, बीएफए, एमएफए तसेच काही अभियांत्रिकी अभ्यासक्रमांचे निकाल अजून प्रक्रियेत असल्याची माहिती सूत्रांकडून देण्यात आली आहे. नवीन शैक्षणिक धोरणानुसार प्रथम वर्षाच्या काही परीक्षा ‘होम सेंटर व होम असेसमेंट’ पद्धतीने घेण्यात आल्या होत्या; मात्र काही महाविद्यालयांनी अद्याप निकाल जाहीर न केल्याने विलंब झाल्याचे सांगितले जात आहे.
या प्रकरणाचा आढावा घेण्यासाठी विद्यापीठाने समिती नेमली असून परीक्षा मंडळाच्या बैठकीत हा विषय मांडला जाणार असल्याची माहिती अधिकाऱ्यांनी दिली आहे. विद्यार्थ्यांना मात्र उर्वरित सात निकालांची प्रतीक्षा अजूनही कायम आहे.
Comments are closed.