छत्रपती शाहू महाराज प्रशिक्षण, संशोधन आणि मानव विकास संस्था अर्थात ‘सारथी’ ही स्वायत्त सरकारी संस्था आज दीड महिन्यांपासून नेतृत्वाविना अडखळली आहे. संस्थेचा व्यवस्थापकीय संचालक पद रिक्त असल्यामुळे संपूर्ण प्रशासकीय यंत्रणा ठप्प झाली आहे. परिणामी, विद्यार्थी आणि अभ्यासू तरुणांसाठी राबवल्या जाणाऱ्या महत्त्वाच्या योजना रखडल्या आहेत.
निधी अभावी थांबल्या शिष्यवृत्ती योजना
देशांतर्गत शिष्यवृत्ती योजना जाहीर व्हायला हवी होती, पण आजपर्यंत तिची जाहिरातही प्रसिद्ध झालेली नाही. परदेशी शिष्यवृत्ती योजनेंतर्गत पात्र विद्यार्थ्यांची यादीदेखील अद्याप जाहीर झालेली नाही. त्यामुळे शेकडो गरजू विद्यार्थी मार्गदर्शन आणि आर्थिक मदतीपासून वंचित राहिले आहेत.
JEE/NEET कोचिंग, पोलिस भरती मार्गदर्शन वर्गही ठप्प
सारथी संस्थेच्या अंतर्गत राबवल्या जाणाऱ्या जेईई/नीट कोचिंग क्लासेस अजूनही सुरू झालेले नाहीत. त्याचप्रमाणे पोलिस भरतीसाठीचे मार्गदर्शन वर्गही थांबलेले आहेत. या योजनांमधून मागासवर्गीय आणि आर्थिकदृष्ट्या दुर्बल घटकातील विद्यार्थ्यांना मोठा फायदा होत असे, मात्र आता ही संधीही दुर्लक्षित होत आहे.
‘सारथी’ संस्थेला ‘सारथी’ नाही – निधीची वानवा जाणवतेय
या संस्थेसाठी निधी उपलब्ध असताना केवळ कारभार नसल्यामुळे योजनांची अंमलबजावणी रखडत आहे. संचालक पद रिक्त असल्याने आर्थिक वाटप आणि योजना मंजुरीचे प्रस्तावही प्रलंबित आहेत. त्यामुळे सरकारच्या विविध योजनांचा लाभ घेण्यास विद्यार्थी अकारण अडथळ्यांना सामोरे जात आहेत.
पुणे जिल्ह्यात मुख्यालय, पण पालकमंत्री अजित पवार गप्प?
सारथी संस्थेचे मुख्यालय पुण्यात आहे आणि उपमुख्यमंत्री अजित पवार हेच पुण्याचे पालकमंत्री आहेत. ते वारंवार सांगतात की “कोणत्याही शासकीय योजनेला निधी कमी पडू देणार नाही”, पण त्यांच्याच जिल्ह्यातील या संस्थेच्या योजनांना निधी आणि कार्यवाही दोन्ही अडकल्याचं चित्र आहे. त्यामुळे या विषयावर अजित पवार काय भूमिका घेतात हे महत्त्वाचं ठरणार आहे.
विद्यार्थ्यांमध्ये नाराजी – त्वरित नियुक्तीची गरज
विविध महाविद्यालयातील आणि शिष्यवृत्ती पात्र विद्यार्थ्यांमध्ये सारथीच्या कारभाराबाबत तीव्र नाराजी आहे. शैक्षणिक वर्ष सुरू होऊन दोन महिने उलटले तरी योजना सुरूच नाहीत, यामुळे त्यांच्या शिक्षणाच्या संधी धोक्यात आल्या आहेत. त्यामुळे संचालक पदावर तातडीने नियुक्ती करून योजनांना गती द्यावी, अशी विद्यार्थ्यांची मागणी आहे.
संस्थेच्या विश्वासार्हतेला सुरुंग – धोरणात्मक उदासीनता?
‘सारथी’ ही संस्था म्हणजे पश्चिम महाराष्ट्रातील लाखो विद्यार्थ्यांसाठी आशेचा किरण आहे. परंतु आज तिच्याच कार्यपद्धतीवर प्रश्नचिन्ह उपस्थित होत आहे. ही केवळ व्यवस्थापकीय त्रुटी नाही, तर सरकारच्या धोरणात्मक उदासीनतेचा नमुना आहे, अशी टीका शैक्षणिक व सामाजिक क्षेत्रातून होत आहे.
योजनांचं भवितव्य धोक्यात – सरकारने तातडीने हस्तक्षेप करावा
सारथीच्या रखडलेल्या योजना, निधीची वानवा आणि विद्यार्थ्यांचा वाढता तणाव शिक्षणाच्या सर्वांगिण समावेशाच्या दृष्टीने धोकादायक आहे. त्यामुळे सरकारने यामध्ये तातडीने हस्तक्षेप करून संचालकाची नियुक्ती, योजना सुरूवात आणि निधी वितरण यावर ठोस पावले उचलावीत, अशी सर्वसामान्यांची अपेक्षा आहे.
Comments are closed.