नाशिक जिल्ह्यातील शिक्षकांना वेतनासाठी पुन्हा एकदा प्रतीक्षा करावी लागण्याची शक्यता निर्माण झाली आहे. शिक्षण विभागाकडून सुरू असलेल्या दिरंगाईमुळे जानेवारीपासून वेतन वेळेत मिळत नसून आता मार्च महिन्याचे वेतनही रखडण्याची चिन्हे दिसत आहेत.
दर महिन्याला शाळांकडून वेतन देयके गोळा करून ती प्रक्रिया पूर्ण केल्यानंतर पाच तारखेपर्यंत शिक्षकांच्या खात्यात पगार जमा होणे अपेक्षित असते. मात्र गेल्या काही महिन्यांपासून ही संपूर्ण प्रक्रिया विस्कळीत झाली आहे. दहा तारीख उलटल्यानंतरही वेतन जमा न होणे ही बाब आता नेहमीची झाली आहे.
यंदा तर २७ तारीख उलटूनही वेतन देयकांची मागणीच करण्यात आलेली नाही, त्यामुळे वेतन प्रक्रिया आणखी लांबणीवर जाण्याची शक्यता आहे. यामुळे शिक्षक व शिक्षकेतर कर्मचाऱ्यांमध्ये नाराजी वाढत आहे.
दरम्यान, सेवा हमी कायद्याचे पालन करण्याच्या सूचना शाळांना दिल्या जात असताना, हेच नियम अधिकाऱ्यांना लागू नाहीत का? असा प्रश्न शिक्षकांकडून उपस्थित केला जात आहे.
पूर्वी वेतन पत्रकांवर सह्या न करण्याच्या निर्णयामुळेही प्रक्रिया प्रभावित झाली होती. नंतर आंदोलनानंतर हा निर्णय मागे घेण्यात आला, तरीही परिस्थितीत सुधारणा झालेली नाही. सलग तीन महिन्यांपासून वेतन उशिरा मिळत असल्याने शिक्षकांमध्ये संतापाची भावना वाढत आहे.
Comments are closed.