शिक्षण हक्क कायदा (RTE) अंतर्गत २५ टक्के राखीव जागांवरील प्रवेशासाठी यंदा राज्यभरातून २ लाख ८८ हजारांहून अधिक अर्ज प्राप्त झाले आहेत. प्राथमिक शिक्षण विभागाने स्पष्ट केले आहे की, अर्ज भरण्यासाठी दिलेल्या मुदतीनंतर आता कोणतीही मुदतवाढ दिली जाणार नाही.
या प्रवेश प्रक्रियेसाठी ऑनलाइन सोडत (लॉटरी) आणि पुढील प्रवेशाचे सविस्तर वेळापत्रक स्वतंत्रपणे जाहीर करण्यात येणार असल्याची माहिती शिक्षण विभागाने दिली आहे. खासगी शाळांमधील आरटीई अंतर्गत प्रवेशासाठी दरवर्षीप्रमाणे यंदाही केंद्रीकृत ऑनलाइन प्रक्रिया राबविण्यात येत आहे.
यंदा राज्यातील ८,७०१ शाळांमध्ये एकूण १,१४,८३३ जागा उपलब्ध आहेत. यापूर्वी विद्यार्थ्याच्या घरापासून १ किलोमीटरच्या परिसरातील शाळा निवडण्याची अट होती, मात्र उच्च न्यायालयाने ही अट रद्द केल्यामुळे पालकांना अधिक पर्याय उपलब्ध झाले आणि त्यानुसार अर्ज प्रक्रियाही सुलभ करण्यात आली.
अर्ज भरण्याची अंतिम मुदत सुरुवातीला २५ मार्च होती, परंतु नंतर ती वाढवून मंगळवारपर्यंत करण्यात आली. या कालावधीत मोठ्या संख्येने पालकांनी आपल्या मुलांच्या प्रवेशासाठी अर्ज केले.
तथापि, गेल्या वर्षीच्या तुलनेत यंदा अर्जांची संख्या किंचित घटलेली दिसून येत आहे. मागील वर्षी जवळपास ३ लाखांहून अधिक अर्ज प्राप्त झाले होते, तर यंदा हा आकडा २.८८ लाखांवर स्थिरावला आहे.
Comments are closed.