राज्यातील महसूल सेवकांचा दीर्घकाळ प्रलंबित प्रश्न मार्गी लावण्यासाठी राज्य सरकारने सकारात्मक पावले उचलली आहेत. महसूलमंत्री चंद्रशेखर बावनकुळे यांनी महसूल सेवकांना तलाठी भरतीमध्ये प्राधान्य देण्याचे आश्वासन दिले आहे.
या निर्णयामुळे महसूल सेवकांच्या अनुभवाचा योग्य फायदा घेता येईल, तसेच त्यांच्या प्रश्नांवर तातडीने तोडगा काढला जाईल.
मंत्रालयात झालेल्या उच्चस्तरीय बैठकीत मुख्य सचिव, अतिरिक्त मुख्य सचिव, वित्त आणि महसूल विभागाचे वरिष्ठ अधिकारी तसेच महसूल सेवक संघटनेचे पदाधिकारी उपस्थित होते. बैठकीत महसूल सेवकांना चतुर्थ श्रेणीमध्ये समाविष्ट करून वेतनश्रेणी मंजूर करण्याची मागणीही विचारात घेण्यात आली, परंतु सध्याच्या नियमांनुसार ते शक्य नसल्याचे स्पष्ट करण्यात आले.
पर्याय म्हणून महसूलमंत्री यांनी अनुभवाच्या आधारे तलाठी भरतीमध्ये काही जागा राखीव ठेवण्याचा प्रस्ताव मांडला, ज्यामुळे किमान पाच वर्षांचा अनुभव असलेल्या महसूल सेवकांना २५ अतिरिक्त गुण मिळतील. या प्रस्तावाला वरिष्ठ अधिकाऱ्यांकडून सकारात्मक प्रतिसाद मिळाला असून लवकरच शासन निर्णय जाहीर होण्याची शक्यता आहे.
त्याशिवाय महसूल सेवकांच्या इतर मागण्यांवरही सरकार सकारात्मक भूमिका घेणार आहे. पूर्वी त्यांच्या मानधनात वाढ करण्यात आली असून, संप आणि पूरस्थितीच्या काळातील अडचणींनंतर महसूल सेवकांचा अनुभव राज्य प्रशासन अधिक परिणामकारक करण्यासाठी वापरण्यात येणार आहे. तसेच, महसूल सेवकांनी जबाबदारीने काम करावे, असेही बैठकीत निर्देश देण्यात आले आहेत.
Comments are closed.