घरबसल्या रेशन कार्ड e-KYC करा – सोपी ऑनलाईन प्रक्रिया जाणून घ्या! | Do Ration Card e-KYC at Home!

केंद्र सरकारकडून गरजू नागरिकांना मोफत धान्य मिळावे यासाठी रेशन कार्ड दिले जाते. हा लाभ योग्य व पात्र लाभार्थ्यांपर्यंतच पोहोचावा, यासाठी सरकारने रेशन कार्डची e-KYC प्रक्रिया अनिवार्य केली आहे. जर तुमच्या रेशन कार्डची e-KYC पूर्ण नसेल, तर मोफत रेशन मिळणे बंद होऊ शकते आणि रेशन कार्डमधून तुमचे नावही वगळले जाऊ शकते.

दिलासादायक बाब म्हणजे ही प्रक्रिया आता घरबसल्या ऑनलाईन करता येते. नवीन नियमांनुसार प्रत्येक रेशन कार्डधारकाला दर पाच वर्षांनी e-KYC करणे बंधनकारक आहे. २०१३ च्या सुमारास ज्यांनी e-KYC केली होती, त्यांना आता पुन्हा रेशन कार्ड अपडेट करणे आवश्यक झाले आहे.

शिधापत्रिका हा अन्नसुरक्षेचा महत्त्वाचा दस्तऐवज असून ओळखीचा पुरावा म्हणूनही त्याचा वापर होतो, त्यामुळे त्याची वेळोवेळी पडताळणी अत्यंत गरजेची आहे.

घरबसल्या e-KYC करण्यासाठी आपल्या मोबाईलमध्ये “मेरा रेशन” आणि “Aadhaar FaceRD” ही अ‍ॅप्स इन्स्टॉल करून अ‍ॅप उघडा, राज्य-जिल्हा निवडा, आधार क्रमांक, कॅप्चा व OTP टाका. त्यानंतर आधारशी संबंधित माहिती दिसेल; Face e-KYC पर्याय निवडून मोबाईलच्या सेल्फी कॅमेर्‍याने चेहरा स्कॅन करा.

स्कॅन यशस्वी झाल्यावर e-KYC पूर्ण होते. e-KYC झाले आहे की नाही हे तपासण्यासाठी “मेरा रेशन” अ‍ॅपमध्ये पुन्हा लॉग-इन करून लोकेशन, आधार क्रमांक, कॅप्चा व OTP भरल्यावर Status ‘Y’ असल्यास e-KYC पूर्ण झालेले समजावे, तर Status ‘N’ असल्यास प्रक्रिया अपूर्ण आहे.

ऑनलाईन अडचण आल्यास तुम्ही थेट रेशन कार्ड डीलरकडे किंवा CSC (कॉमन सर्व्हिस सेंटर) येथे जाऊन आधार कार्ड व रेशन कार्डच्या मदतीने ऑफलाईन e-KYC करू शकता. थोडक्यात, रेशन कार्डचा लाभ सुरू ठेवण्यासाठी वेळेत e-KYC पूर्ण करा आणि भविष्यातील अडचणी टाळा.