दिव्यांगांसाठी रेल्वेत मोठी संधी! बसून काम, पगारासोबत कमिशनचीही कमाई! | Railway job opportunity for disabled with commission!

भारतीय रेल्वेकडून बेरोजगारांसाठी, विशेषतः दिव्यांग नागरिकांसाठी एक मोठी रोजगाराची सुवर्णसंधी उपलब्ध झाली आहे. झाशी मंडळात ऑटोमॅटिक तिकीट व्हेंडिंग मशीन (ATVM) चालवण्यासाठी सहाय्यक पदांची भरती जाहीर करण्यात आली असून, या पदांसाठी केवळ दिव्यांग उमेदवारांनाच अर्ज करता येणार आहे. या उपक्रमांतर्गत 12 रेल्वे स्थानकांवर बसवण्यात आलेल्या 22 एटीव्हीएम मशीनच्या संचालनासाठी एकूण 65 पदे भरली जाणार आहेत.

या भरतीमध्ये लोकोमोटर डिसएबिलिटी असलेल्या उमेदवारांना प्राधान्य दिले जाणार असून, सेवानिवृत्त रेल्वे कर्मचारी, त्यांच्या दिव्यांग कुटुंबीयांसह इतर पात्र दिव्यांग नागरिकही अर्ज करू शकतात. निवड झालेल्या उमेदवारांचे मुख्य काम म्हणजे प्रवाशांना एटीव्हीएम मशीनद्वारे तिकीट काढण्यास मदत करणे असेल. या कामासाठी उमेदवारांना प्रत्येक तिकीटावर निश्चित कमिशन मिळणार असून, त्यामुळे त्यांना नियमित उत्पन्नाचा चांगला स्रोत मिळू शकतो.

ही सुविधा वीरांगना लक्ष्मीबाई झांसी, ग्वालियर, मुरैना, बांदा, चित्रकूट धाम कर्वी, महोबा, ललितपूर, डबरा, दतिया, उरई, खजुराहो आणि हरपालपूर या स्थानकांवर उपलब्ध आहे. इच्छुक उमेदवारांनी सोमवार ते शुक्रवार सकाळी 9 ते सायंकाळी 5 या वेळेत जवळच्या रेल्वे बुकिंग कार्यालयातून अर्ज फॉर्म घ्यावा किंवा North Central Railway च्या अधिकृत वेबसाइटवरून डाउनलोड करावा. अर्ज करण्याची अंतिम तारीख 27 मार्च 2026 निश्चित करण्यात आली आहे.