रेल्वे प्रवासादरम्यान अचानक प्रकृती बिघडल्यास किंवा वैद्यकीय मदतीची गरज भासल्यास ‘रेल मदत’ अॅप प्रवाशांसाठी मोठा आधार ठरत आहे. गेल्या आठ महिन्यांत १,६१५ प्रवाशांना अॅपवरून वैद्यकीय मदत मिळाली असून, २०२४ च्या तुलनेत ही संख्या लक्षणीयरीत्या वाढली आहे.
रेल्वे प्रवास स्वस्त आणि लोकप्रिय असल्यामुळे प्रवाशांना अनेक अडचणींना सामोरे जावे लागते. चोरी, डबे स्वच्छता, खानपान आणि वैद्यकीय अडचणी यावर उपाययोजना करण्यासाठी जुलै २०१९ मध्ये ‘रेल मदत’ अॅप सुरू केले गेले होते.
सुरुवातीला नागरिकांनी अॅपवर जास्त तक्रारी नोंदवल्या नसल्या, परंतु त्वरित मदत मिळत असल्याचे लक्षात आल्यानंतर अॅप वापरकर्त्यांची संख्या वाढली. यंदा रेल्वे मंत्रालयाने अॅपवरील तक्रारींवर लक्ष ठेवून उपाययोजना सुचविल्या आहेत, ज्यामुळे वैद्यकीय अडचणींमध्ये त्वरित मदत मिळत आहे.
अॅपवरील तक्रारींमध्ये ६६ अडचणींना प्राधान्याने निराकरण केले जाते. वैद्यकीय मदतीसाठी २४ तास टीम तयार असते आणि दिवसभर येणाऱ्या तक्रारींचा वरिष्ठ पातळीवर आढावा घेतला जातो. गाडीत किंवा स्टेशनवर उद्भवलेल्या आपत्कालीन परिस्थितीत जवळच्या स्टेशनवरील कर्मचारी, वैद्यकीय पथक, गरज पडल्यास रुग्णवाहिका आणि स्थानिक रुग्णालयांशी समन्वय साधून त्वरित मदत पोहोचवली जाते.
रेल्वे प्रशासनाचे म्हणणे आहे की, प्रवाशांची सुरक्षा आणि आरोग्य हीच सर्वोच्च जबाबदारी असून, ‘रेल मदत’ अॅपमुळे प्रवास अधिक सुरक्षित आणि निश्चिंत बनत आहे. एप्रिल ते नोव्हेंबर २०२५ या काळात आलेल्या वैद्यकीय तक्रारी १,६१५ आहेत, तर याच कालावधीत २०२४ मध्ये १,२०६ तक्रारी नोंदल्या गेल्या होत्या. वाढत्या तक्रारींमुळे प्रशासन रोज वरिष्ठ पातळीवर आढावा बैठक घेऊन तत्पर सेवा सुनिश्चित करत आहे.
या अॅपमुळे प्रवाशांना त्वरित मदत आणि निराकरण मिळत असल्याचे अनुभव वाढले असून, रेल्वे प्रवास आता अधिक सुरक्षित, सोयीस्कर आणि आत्मविश्वासपूर्ण बनत आहे.
Comments are closed.