पुणे महापालिकेतर्फे कनिष्ठ अभियंता (स्थापत्य) या १६९ पदांसाठी १ डिसेंबर रोजी होणारी परीक्षा अखेर पुढे ढकलण्यात आली आहे. परीक्षा केंद्रांशी संबंधित अडचणी, निवडणूक प्रक्रिया आणि इतर तांत्रिक कारणांमुळे हा निर्णय घेण्यात आला असल्याची माहिती प्रशासनाने दिली आहे. उमेदवारांची संख्या तब्बल ४२ हजार असल्यामुळे अनेकांना दूरच्या परीक्षा केंद्रांवर जावे लागत होते. यामुळे निवडणूक मतदानाशी तडजोड होण्याची शक्यता होती.
याआधीही ही भरती प्रक्रिया अनेकदा रखडली होती. लोकसभा-विधानसभा निवडणुका, मराठा आरक्षण प्रक्रिया, तसेच ‘आयबीपीएस’सोबतचा करार संपणे या कारणांमुळे परीक्षा वारंवार पुढे ढकलण्यात आली होती. नव्याने करार झाल्यानंतर पदसंख्या वाढवून ११३ वरून १६९ करण्यात आली आणि उमेदवारांना पुन्हा अर्ज करण्याची परवानगी देण्यात आली.
राज्यातील नगरपालिका व नगरपरिषद निवडणुकीचे मतदान २ डिसेंबरला असल्याने अनेक परीक्षार्थी सध्या सरकारी सेवेत असून त्यांना मतदानाच्या कामात भाग घ्यावा लागणार होता. तसेच एकाच दिवशी इतर परीक्षा असल्याने अनेक उमेदवारांनी परीक्षा पुढे ढकलण्याची मागणी केली होती. काही विद्यार्थ्यांनी निवडणूक आयोगाकडेही निवेदन दिले होते. याचा सर्वंकष आढावा घेऊन महापालिकेने अखेर परीक्षा पुढे ढकलण्याचा निर्णय घेतला.
दरम्यान, कनिष्ठ अभियंता भरतीसंदर्भात दुसरा मुद्दा पुढे आला आहे. परीक्षेचा निकाल दोन महिन्यांनी लावला जाईल, असे महापालिकेने जाहीर केल्यानंतर ‘पुणे कंत्राटदार असोसिएशन’ने तीव्र आक्षेप घेतला आहे. ऑनलाइन परीक्षा असूनही निकाल जाहीर होण्यासाठी दोन महिने कशासाठी, असा सवाल करत असोसिएशनने निकाल तत्काळ जाहीर करण्याची मागणी केली आहे. परीक्षेच्या दिवशीच उमेदवाराला त्याचे गुण आणि गुणवत्ता क्रमांक माहिती व्हावा अशी मागणी त्यांनी आयुक्तांकडे ठेवली असून, अन्यथा न्यायालयात दाद मागण्याचा इशाराही दिला आहे.
असोसिएशनच्या मते, आधीच्या भरतीतही निकाल जाहीर होण्यासाठी दोन महिन्यांपेक्षा जास्त विलंब झाला होता. ऑनलाइन प्रणालीमध्ये पारदर्शकता राखण्यासाठी ‘परीक्षा झाल्यादिवशीच निकाल’ ही प्रक्रिया शक्य असून महापालिकेने तशी अंमलबजावणी करावी, अशी मागणी करण्यात आली.
महापालिका प्रशासनाने मात्र परीक्षेची नवी तारीख लवकरच जाहीर केली जाणार असल्याचे स्पष्ट केले आहे. आता उमेदवारांचे लक्ष महापालिकेकडून येणाऱ्या पुढील अधिकृत घोषणेकडे लागले आहे.
Comments are closed.