राज्यातील विद्यापीठे आणि संलग्न महाविद्यालयांमधील प्राध्यापकांच्या रिक्त पदांवर भरती करण्याच्या प्रक्रियेला अखेर गती मिळाली आहे. सावित्रीबाई फुले पुणे विद्यापीठासह राज्यातील अकृषी विद्यापीठांमध्ये अनेक वर्षांपासून रिक्त असलेल्या सहायक प्राध्यापक पदांचा वनवास आता संपणार असल्याचे संकेत मिळाले आहेत. राज्यात सुमारे पाच हजार १२ सहायक प्राध्यापक पदांची भरती करण्यासाठी प्रक्रिया सुरू करण्यात आली असून, येत्या शैक्षणिक वर्षाच्या सुरुवातीपर्यंत ही भरती पूर्ण करण्याचा सरकारचा प्रयत्न असल्याची माहिती उच्च व तंत्रशिक्षण मंत्री चंद्रकांत पाटील यांनी विधान परिषदेत दिली.
आमदार रणजितसिंह मोहिते-पाटील यांनी राज्यातील विद्यापीठांमधील रिक्त पदांबाबत उपस्थित केलेल्या तारांकित प्रश्नाला उत्तर देताना मंत्री पाटील यांनी ही माहिती स्पष्ट केली. त्यांच्या मते, विद्यापीठांमध्ये गुणवत्तापूर्ण अध्यापनासाठी रिक्त पदे भरणे अत्यंत आवश्यक असल्याने सरकारने भरती प्रक्रियेला प्राधान्य दिले आहे.
पुणे विद्यापीठात १४५ पदे रिक्त
सावित्रीबाई फुले पुणे विद्यापीठात प्राध्यापकांच्या २८७ मंजूर पदांपैकी सध्या केवळ १४२ पदांवरच प्राध्यापक कार्यरत आहेत, तर १४५ पदे रिक्त आहेत. या सर्व रिक्त पदांवर भरती करण्यास सरकारने मंजुरी दिली असून, प्रशासकीय पातळीवर त्यासाठीची प्रक्रिया सुरू झाली आहे. पुण्याप्रमाणेच मुंबई विद्यापीठात २३५ आणि नागपूर विद्यापीठात २०९ पदे रिक्त असून, या ठिकाणीही मोठ्या प्रमाणावर भरती होणार आहे.
राज्यातील विद्यापीठांतील एकूण रिक्त पदे
मंत्री पाटील यांनी दिलेल्या माहितीनुसार, राज्यातील १५ विद्यापीठांमध्ये एकूण २,६०० शैक्षणिक पदे मंजूर आहेत. मात्र त्यापैकी १,४८७ पदे सध्या रिक्त आहेत. या रिक्त पदांपैकी पहिल्या टप्प्यात ६८७ पदांच्या भरतीस तातडीने मंजुरी देण्यात आली आहे.
भरतीसाठी नवे ‘वेटेज’ सूत्र
सहायक प्राध्यापक भरतीमध्ये पारदर्शकता आणि गुणवत्ता राखण्यासाठी राज्य सरकारने नवीन वेटेज प्रणाली लागू केली आहे. आता केवळ मुलाखतीवर भरती अवलंबून राहणार नाही. उमेदवारांच्या निवडीसाठी पुढीलप्रमाणे गुणांचे विभाजन करण्यात आले आहे.
- ६० टक्के गुण – शैक्षणिक पात्रता व संशोधन कार्य
- २० टक्के गुण – प्रत्यक्ष मुलाखत
- २० टक्के गुण – अध्यापन कौशल्य (डेमो लेक्चर)
या नव्या पद्धतीमुळे गुणवत्ता असलेल्या उमेदवारांना अधिक संधी मिळेल, असा सरकारचा दावा आहे.
संलग्न महाविद्यालयांतही मोठी भरती
राज्यातील संलग्न महाविद्यालयांमध्येही शिक्षकांची मोठ्या प्रमाणावर कमतरता आहे. या महाविद्यालयांमध्ये एकूण ११,९१८ पदे रिक्त असल्याची माहिती समोर आली आहे. त्यापैकी ४० टक्के कोट्यानुसार ५,०१२ पदांची भरती करण्याची प्रक्रिया ११ फेब्रुवारी २०२६ च्या शासन निर्णयानुसार सुरू करण्यात आली आहे.
एकूणच, अनेक वर्षे प्रलंबित असलेली प्राध्यापक भरती आता प्रत्यक्षात येण्याच्या मार्गावर असल्याने राज्यातील उच्च शिक्षण व्यवस्थेला दिलासा मिळण्याची शक्यता व्यक्त केली जात आहे.
Comments are closed.