महाराष्ट्र राज्य माध्यमिक व उच्च माध्यमिक शिक्षण मंडळाने (MSBSHSE) खासगीरित्या 10वी आणि 12वीची परीक्षा देणाऱ्या विद्यार्थ्यांसाठी जुलै-ऑगस्ट 2025 सत्रासाठी अर्ज प्रक्रिया सुरू केली आहे. फॉर्म क्रमांक 17 अंतर्गत ही परीक्षा घेण्यात येणार असून, विद्यार्थ्यांचे शैक्षणिक नुकसान होऊ नये म्हणून मंडळाने यावर्षी प्रथमच या पर्यायी सत्राची संधी दिली आहे. या परीक्षेसाठी नाव नोंदणी करण्यासाठी विद्यार्थ्यांना 15 एप्रिल 2025 पासून 15 मे 2025 पर्यंत ऑनलाईन अर्ज भरता येणार आहे.
खासगी विद्यार्थ्यांसाठी अर्ज शुल्क 1,110 रुपये असून, त्यासोबतच प्रक्रिया शुल्क 100 रुपये आकारण्यात आले आहे. ही अर्ज प्रक्रिया संपूर्णतः ऑनलाईन माध्यमातून राबवली जाणार असून, कोणताही ऑफलाइन अर्ज स्वीकारण्यात येणार नाही. अर्ज भरताना विद्यार्थ्यांनी परीक्षा देण्याची शाळा किंवा कनिष्ठ महाविद्यालय, त्यांचा सांकेतांक, विषय योजना, माध्यम, शाखा व इतर आवश्यक माहिती योग्य पद्धतीने नोंदवावी, असे स्पष्ट निर्देश शिक्षण विभागाने दिले आहेत.
महत्त्वाचे म्हणजे, जुलै-ऑगस्ट 2025 च्या परीक्षेसाठी फेब्रुवारी-मार्च 2025 मध्ये लागू असलेल्या अटी व शर्ती याच लागू राहणार आहेत. तसेच यावेळी कोणतीही विलंब किंवा अतिविलंब शुल्काची मुदत दिली जाणार नाही, त्यामुळे विद्यार्थ्यांनी अंतिम तारखेपूर्वीच अर्ज प्रक्रिया पूर्ण करावी. यासंदर्भातील अधिकृत मार्गदर्शक पुस्तिका व माहिती मंडळाच्या संकेतस्थळावर www.mahahsscboard.in येथे उपलब्ध आहे.
ही संधी त्यांच्या दृष्टीने खूप महत्त्वाची ठरणार आहे, जे विद्यार्थी याआधीच्या परीक्षेस पात्र ठरले नव्हते किंवा काही कारणास्तव परीक्षा देऊ शकले नाहीत. योग्य नियोजन व तयारीसह अर्ज केल्यास ही परीक्षा त्यांच्यासाठी नवे शैक्षणिक दार उघडू शकते.
त्यामुळे, इच्छुक विद्यार्थ्यांनी ही प्रक्रिया वेळेत पूर्ण करून आपल्या शैक्षणिक प्रगतीसाठी ही सुवर्णसंधी साधावी!
