राज्यभरात मोठ्या प्रमाणावर सुरू झालेल्या पोलिस भरती प्रक्रियेत उमेदवारांसाठी महत्त्वाचा नियम लागू करण्यात आला आहे एका पदासाठी फक्त एकच अर्ज करता येणार आहे. जर एखाद्या उमेदवाराने त्याच पदासाठी एकापेक्षा अधिक जिल्ह्यांमध्ये अर्ज केला, तर सर्व अर्ज रद्द होऊन फक्त एकच अर्ज ग्राह्य धरला जाणार आहे.
संपूर्ण राज्यभरात एकूण १५,६३१ पदांची भरती करण्यात येणार असून, त्यात पोलिस शिपाई, चालक शिपाई, बँड्‌समन, सशस्त्र पोलिस आणि कारागृह शिपाई या पदांचा समावेश आहे. सोलापूर जिल्ह्यात ग्रामीण पोलिस दलात ९०, शहर पोलिस दलात ७९ आणि कारागृह विभागात १५ अशा मिळून १८४ जागा उपलब्ध आहेत.
भरतीसाठी अर्ज करण्याची शेवटची तारीख ३० नोव्हेंबर २०२५ असून, उमेदवारांनी आवश्यक कागदपत्रे — दहावी-बारावी गुणपत्रक, जन्म दाखला, अधिवास (डोमिसाईल), एमएससीआयटी, नॉन-क्रिमिलेयर प्रमाणपत्र तसेच आरक्षणानुसार लागणारी कागदपत्रे — अपलोड करावी लागतील. चालक शिपायांसाठी वाहन चालविण्याची कौशल्य चाचणी बंधनकारक ठेवण्यात आली आहे. अर्ज शुल्क सामान्य प्रवर्गासाठी ₹४५०, तर मागासवर्गीय उमेदवारांसाठी ₹३५० आहे.
शारीरिक चाचणीत पुरुष उमेदवारांसाठी १६०० मीटर धावणे आणि गोळाफेक, तर महिलांसाठी ८०० मीटर धावणे आणि गोळाफेक असे दोन टप्पे असतील. मैदानी परीक्षेत किमान ४० टक्के गुण मिळवणे आवश्यक आहे. या गुणांच्या आधारे लेखी परीक्षेसाठी उमेदवारांची निवड होईल.
लेखी परीक्षा अंकगणित, सामान्यज्ञान, चालू घडामोडी, बुद्धिमत्ता आणि मराठी व्याकरणावर आधारित असेल. या परीक्षेत किमान ५० टक्के गुण बंधनकारक आहेत आणि ती राज्यातील सर्व जिल्ह्यांत एकाच दिवशी घेण्यात येणार आहे.
ही प्रक्रिया पारदर्शक, तंत्रज्ञानाधारित आणि एकसमान ठेवण्यासाठी राज्य पोलिस भरती मंडळाने नव्या मार्गदर्शक सूचना जारी केल्या आहेत. त्यामुळे इच्छुक उमेदवारांनी एकाच पदासाठी फक्त एकच अर्ज करून योग्य तयारीसह ही सुवर्णसंधी साधावी
Comments are closed.