राज्यातील हजारो फार्मसी विद्यार्थ्यांसाठी दिलासादायक बातमी आली आहे! मुंबई उच्च न्यायालयाच्या औरंगाबाद खंडपीठाने अखेर भारतीय फार्मसी परिषदेने (PCI) घातलेली प्रवेशबंदी उठवली आहे. यामुळे महाराष्ट्रातील सर्व फार्मसी महाविद्यालयांना पुन्हा एकदा विद्यार्थ्यांना प्रवेश देण्याची परवानगी मिळाली आहे.
कोविड काळात सुरू झालेल्या अनेक नव्या महाविद्यालयांमध्ये पायाभूत सुविधांच्या तक्रारी आल्याने PCI ने तपासणी केली होती. त्यात १७६ महाविद्यालयांनी आवश्यक निकष पूर्ण न केल्याचे आढळले, त्यामुळे ८९ महाविद्यालयांवर प्रवेशबंदी घालण्यात आली होती. मात्र या कारवाईला अन्यायकारक म्हणत संबंधित संस्थांनी न्यायालयात धाव घेतली.
सुनावणीदरम्यान न्यायमूर्तींनी दोन्ही बाजूंचे म्हणणे ऐकून या महाविद्यालयांवरील बंदी उठविण्याचे आदेश दिले. त्यानंतर PCI ने उच्च व तंत्र शिक्षण विभागाला या निर्णयाची अंमलबजावणी तातडीने करण्याच्या सूचना दिल्या आहेत.
या निर्णयामुळे राज्यातील तिसऱ्या फेरीतील फार्मसी प्रवेश प्रक्रिया पुन्हा सुरू होणार असून, उपलब्ध जागांमध्ये मोठी वाढ होणार आहे. आधीच काही महाविद्यालयांनी आवश्यक अटी पूर्ण करून दुसऱ्या फेरीपूर्वीच प्रवेशाची परवानगी मिळवली होती, त्यामध्ये पदवीच्या १३ आणि पदविकेच्या २५ अशी ३८ महाविद्यालये होती.
आता न्यायालयाच्या या निर्णयामुळे उर्वरित सर्व महाविद्यालयांनाही प्रवेशप्रक्रियेत सहभागी होण्याची संधी मिळणार आहे. विद्यार्थ्यांसाठी ही मोठी दिलासादायक बातमी ठरली असून, फार्मसी अभ्यासक्रमातील तिसऱ्या फेरीच्या प्रवेशांमध्ये आता मोठी चैतन्याची लाट दिसणार आहे.
Comments are closed.