कृत्रिम बुद्धिमत्ता म्हणजेच एआय (AI) तंत्रज्ञानाचा विस्तार होत असताना जगभरातील आयटी कंपन्यांमध्ये मोठे बदल घडताना दिसत आहेत. अशातच अमेरिकेतील दिग्गज आयटी कंपनी Oracle मोठ्या प्रमाणावर कर्मचारी कपात करण्याच्या तयारीत असल्याची चर्चा सुरू झाली आहे. एका अहवालानुसार कंपनी सुमारे ३० हजार कर्मचाऱ्यांना कामावरून कमी करण्याची योजना आखत आहे. डेटा सेंटर्सचा मोठ्या प्रमाणावर विस्तार करण्यासाठी आणि त्यासाठी लागणारा प्रचंड खर्च भागवण्यासाठी ही कपात केली जाऊ शकते, असे सांगितले जात आहे.
माहितीनुसार, कंपनी एआय डेटा सेंटर्स उभारण्यासाठी ५० अब्ज डॉलर्सपेक्षा जास्त निधी उभारण्याच्या तयारीत आहे. एआय तंत्रज्ञानामुळे अनेक कामे मशीन आणि ऑटोमेशनच्या मदतीने केली जात असल्याने मानवी मनुष्यबळाची गरज कमी होत असल्याची चर्चा सध्या उद्योगक्षेत्रात सुरू आहे. काही तज्ज्ञांच्या मते, एआयमुळे काही पारंपरिक नोकऱ्या कमी होतील, मात्र त्याच वेळी नवीन तंत्रज्ञानाशी संबंधित नवीन रोजगाराच्या संधीही निर्माण होतील.
अहवालांनुसार, डेटा सेंटर विस्तारासाठी लागणाऱ्या मोठ्या गुंतवणुकीमुळे कंपनीसमोर रोख रकमेचे व्यवस्थापन करण्याचे आव्हान उभे राहिले आहे. त्यामुळे खर्च कमी करण्यासाठी कर्मचारी कपातीचा मार्ग अवलंबला जात असल्याचे सांगितले जाते. यापूर्वीही सप्टेंबर २०२५ मध्ये कंपनीने भारत, अमेरिका, कॅनडा आणि फिलीपिन्समध्ये सुमारे ३,००० कर्मचाऱ्यांना कामावरून कमी केले होते.
जर ही योजना अमलात आली तर ३० हजार कर्मचाऱ्यांची कपात ही कंपनीच्या इतिहासातील सर्वात मोठी पुनर्रचना प्रक्रिया ठरू शकते. ही प्रक्रिया याच महिन्यापासून सुरू होण्याची शक्यता व्यक्त केली जात आहे. सध्या कंपनीने नवीन भरतीही तात्पुरती थांबवली असल्याचे सांगितले जाते. मे २०२५ पर्यंत जगभरात कंपनीकडे सुमारे १.६२ लाख कर्मचारी कार्यरत होते.
दरम्यान, कंपनी Meta, xAI आणि OpenAI सारख्या मोठ्या तंत्रज्ञान कंपन्यांना सेवा पुरवते. या कंपन्यांच्या वाढत्या एआय प्रकल्पांसाठी डेटा सेंटर्सचा विस्तार करणे आवश्यक बनले आहे. मात्र, अमेरिकेतील काही बँकांनी या प्रकल्पांसाठी दिले जाणारे कर्ज कमी केल्यामुळे आर्थिक दबाव वाढला आहे. त्यामुळे खर्च नियंत्रणात ठेवण्यासाठी आणि मोठ्या गुंतवणुकीसाठी निधी उभारण्यासाठी कंपनी कर्मचारी कपातीचा निर्णय घेण्याच्या तयारीत असल्याचे सांगितले जात आहे.
Comments are closed.