अखेर पुणे महापालिकेच्या स्थापत्य शाखेमधील कनिष्ठ अभियंता (वर्ग-३) पदांची रखडलेली भरती प्रक्रियेची गाडी रुळावर आली आहे. आधी ११३ जागांसाठी जाहिरात काढण्यात आली होती, पण आता मराठा आरक्षणाचा समावेश करत ती सुधारित जाहिरात लवकरच प्रसिद्ध होणार आहे, आणि भरतीसाठीच्या जागा वाढून १६९ करण्यात आल्या आहेत.
२०२४ च्या जानेवारीमध्ये ही भरती निघाली होती, पण एसईबीसी आरक्षण लागू झाल्यामुळे थांबवावी लागली. नगरविकास विभागाच्या मार्गदर्शनानंतर आणि विभागीय आयुक्त कार्यालयाने तपासलेल्या बिंदुनामावलीनुसार, सध्या १७१ पदं रिकामी आहेत. त्यातली दोन पदं लाड-पागे समितीनुसार आधीच भरली गेली असल्यामुळे आता १६९ जागांसाठीच भरती होणार आहे.
९ जानेवारी २०२४ रोजी निघालेल्या जाहिरातीला तब्बल २७,८७९ उमेदवारांनी प्रतिसाद दिला होता. त्यातील अनेकांची वयोमर्यादा आता संपली असली, तरी महापालिकेच्या शिफारशीवरून राज्य शासनाने त्यांना वयात सूट दिली आहे. त्यामुळे त्यांच्या अर्जांना वैध मानलं जाणार असून, प्रवर्ग सुधारण्याचीही संधी दिली जाणार आहे.
ही सुधारित प्रक्रिया आयबीपीएस मार्फत राबवली जाणार असून, यासंबंधीचा प्रस्ताव स्थायी समितीकडे सादर करण्यात आलेला आहे. याआधीच्या दोन टप्प्यांमध्ये महापालिकेने अनुक्रमे ४४८ व ३२० पदांची भरती पूर्ण केली होती. ही भरती प्रक्रिया तिसऱ्या टप्प्यात येते आणि स्थापत्य शाखेत मोठ्या प्रमाणावर कनिष्ठ अभियंत्यांची भरती होणार आहे.
Comments are closed.