शिधापत्रिका किंवा रेशन कार्ड हे प्रत्येक कुटुंबासाठी अतिशय महत्त्वाचे सरकारी दस्तऐवज आहे. या कार्डच्या माध्यमातून मोफत किंवा सवलतीच्या दरात धान्य, गॅस कनेक्शन तसेच अनेक सरकारी योजना लाभार्थ्यांपर्यंत पोहोचतात. यात कुटुंबातील सदस्यांची नावे, पत्ता आणि सर्व माहिती नोंदवलेली असते. त्यामुळे प्रत्येक घरात हे दस्तऐवज असणे आवश्यक आहे.
रांगा नाहीत, त्रास नाही – ऑनलाईन अर्जाची सोय
पूर्वी रेशन कार्डसाठी नागरिकांना शासकीय कार्यालयात जाऊन तासन्तास रांगेत उभे राहावे लागायचे. मात्र आता हा त्रास टळला आहे. केंद्र सरकारने दिलेल्या डिजिटल सुविधेमुळे तुम्ही घरबसल्या मोबाईलच्या माध्यमातूनच नवे रेशन कार्ड काढू शकता. उमंग (UMANG) अॅप वापरून काही सोप्या स्टेप्समध्ये हा अर्ज करता येतो.
अर्जासाठी कोणती कागदपत्रे लागतील?
रेशन कार्डसाठी ऑनलाईन अर्ज करण्यासाठी खालील महत्त्वाची कागदपत्रे तयार ठेवा –
- कुटुंबातील सर्व सदस्यांचे आधार कार्ड
- पत्त्याचा पुरावा (उदा. लाईट बिल, भाडे करार इ.)
- पासपोर्ट आकाराचा फोटो
- उत्पन्नाचा दाखला
- पॅन कार्ड (असल्यास)
- आधारशी जोडलेला मोबाईल क्रमांक
उमंग अॅपवरून अर्ज कसा कराल?
- सर्वप्रथम तुमच्या मोबाईलवर UMANG अॅप डाउनलोड करा.
- मोबाईल नंबर टाकून नोंदणी पूर्ण करा.
- होमपेजवर जाऊन Services या विभागात क्लिक करा.
- त्यानंतर Utility Services मध्ये जाऊन Apply Ration Card हा पर्याय निवडा.
- येथे आपले राज्य निवडा.
- वैयक्तिक माहिती जसे की – नाव, वडिलांचे/पतीचे नाव, जन्मतारीख आणि पत्ता भरावा.
- सर्व आवश्यक कागदपत्रे स्कॅन करून अपलोड करा.
- शेवटी Submit वर क्लिक करा.
कोणकोणत्या राज्यांमध्ये उपलब्ध आहे ही सुविधा?
सध्या चंदीगड, लडाख, दादरा आणि नगर हवेली अशा काही केंद्रशासित प्रदेशांतील नागरिक या उमंग अॅपच्या माध्यमातून थेट ऑनलाईन रेशन कार्डसाठी अर्ज करू शकतात. इतर राज्यांमध्येही ही सुविधा टप्प्याटप्प्याने सुरू होणार आहे.
घरबसल्या अर्जाची सोय – वेळ आणि पैसे दोन्हींची बचत
या प्रक्रियेमुळे तुम्हाला कोणत्याही शासकीय कार्यालयात जाण्याची गरज नाही. रांगेत उभं राहण्याचा त्रास वाचतो, तसेच तुमचा वेळ आणि प्रवासाचा खर्चही वाचतो. अगदी काही मिनिटांत मोबाईलवरून अर्ज सबमिट करता येतो.
प्रत्येक कुटुंबासाठी उपयुक्त
आज अनेक योजना रेशन कार्डाशी जोडलेल्या आहेत. त्यामुळे जर तुमच्याकडे अजूनही रेशन कार्ड नसेल, तर घरबसल्या ही डिजिटल सुविधा वापरून अर्ज नक्की करा. ही एक सुवर्णसंधी आहे जी तुमच्या कुटुंबासाठी महत्त्वाची ठरू शकते.
Comments are closed.