राज्यातील शेतकऱ्यांसाठी दिलासादायक बातमी समोर आली आहे. नमो शेतकरी महासन्मान निधी योजनेचा ८वा हप्ता ₹२,००० लवकरच शेतकऱ्यांच्या खात्यात जमा होण्याची शक्यता आहे.
पीएम किसान सन्मान निधीचा २१ वा हप्ता १९ नोव्हेंबर २०२५ रोजी जमा झाल्यानंतर, राज्यातील लाखो शेतकरी या हप्त्याकडे डोळे लावून बसले होते.
नमो शेतकरी योजना ही केंद्राच्या पीएम किसान योजनेला पूरक असून, पात्र शेतकऱ्यांना केंद्राकडून मिळणाऱ्या ₹६,००० व्यतिरिक्त राज्य सरकारकडूनही ₹६,००० वार्षिक मदत दिली जाते. त्यामुळे शेतकऱ्यांना वर्षाला एकूण ₹१२,००० आर्थिक आधार मिळतो.
पीएम किसानचा हप्ता जमा झाल्यानंतर राज्य सरकारकडून पात्र शेतकऱ्यांची यादी पडताळणी, निधी मंजुरी आणि त्यानंतर शासन निर्णय (GR) जारी केला जातो. अधिकृत माहितीनुसार, ही प्रक्रिया पूर्ण झाल्यानंतर साधारण १५ दिवसांत रक्कम थेट खात्यात जमा केली जाते. त्यामुळे डिसेंबर महिन्याच्या २० तारखेच्या आसपास ८वा हप्ता जमा होण्याची दाट शक्यता वर्तवली जात आहे.
दरम्यान, शेतकऱ्यांनी आपली ई-केवायसी, आधार–बँक लिंक, भूअभिलेखातील नोंद आणि मोबाईल नंबर अद्ययावत आहेत की नाही, हे तपासून ठेवणे आवश्यक आहे. कारण कुठलीही त्रुटी असल्यास हप्ता अडकू शकतो.
हवामानातील अनिश्चितता, वाढलेला खर्च आणि बाजारातील चढउतार यामुळे अडचणीत सापडलेल्या शेतकऱ्यांसाठी हा ८वा हप्ता केवळ आर्थिक मदत नसून, कुटुंबाला दिलासा देणारा आधार ठरणार आहे.
Comments are closed.