नवी मुंबईतील महापालिका शाळांमध्ये दरवर्षी एप्रिलच्या पहिल्या आठवड्यात होणाऱ्या वार्षिक परीक्षा यंदा पुढे ढकलण्यात आल्या आहेत. शिक्षण संचालनालयाने दिलेल्या नव्या सूचनांनुसार या परीक्षा आता ११ ते २२ एप्रिल दरम्यान घेतल्या जाणार आहेत.
समग्र शिक्षा प्रकल्पांतर्गत यंदा संकलित मूल्यमापन चाचणी (Assessment Tests) लागू करण्यात आल्यामुळे हे बदल करण्यात आले आहेत. इयत्ता दुसरी ते आठवीपर्यंतच्या विद्यार्थ्यांसाठी दोन टप्प्यांत या चाचण्या घेतल्या जात आहेत. पहिली परीक्षा आधीच पूर्ण झाली असून दुसरी परीक्षा एप्रिलच्या दुसऱ्या व तिसऱ्या आठवड्यात होणार आहे.
या बदलामुळे विद्यार्थ्यांवर वार्षिक परीक्षा आणि मूल्यमापन चाचण्या अशा दुहेरी परीक्षांचा ताण येणार आहे. तसेच विद्यार्थ्यांना एप्रिल २२ पर्यंत शाळेत उपस्थित राहावे लागणार असल्याने शैक्षणिक सत्रही वाढले आहे.
पूर्वी महापालिका शाळांचे वेळापत्रक एप्रिलच्या पहिल्या आठवड्यात परीक्षा पूर्ण करण्याचे होते, पण नव्या आदेशामुळे शाळांना आपले नियोजन बदलावे लागले आहे. खासगी अनुदानित शाळांच्या परीक्षा मात्र पूर्वनियोजित वेळेनुसार सुरू असून त्या लवकरच संपणार आहेत.
या बदलामागील उद्देश म्हणजे विद्यार्थ्यांचे अध्ययन अधिक सक्षम करणे आणि शैक्षणिक गुणवत्ता सुधारण्यावर भर देणे हा आहे.
Comments are closed.