मुंबई विद्यापीठातील विविध शैक्षणिक पदांच्या भरती प्रक्रियेत महत्त्वाचा बदल करण्यात आला असून, अर्ज करण्याच्या अंतिम मुदतीला मुदतवाढ देण्यात आली आहे. विद्यापीठ प्रशासनाने जाहीर केलेल्या सुधारित अधिसूचनेनुसार, अधिष्ठाता, प्राध्यापक, सहयोगी प्राध्यापक, सहाय्यक प्राध्यापक, उप-ग्रंथपाल व सहाय्यक ग्रंथपाल या पदांसाठीचे ऑनलाइन अर्ज आता २ जानेवारी २०२६ रोजी सायंकाळी ५ वाजेपर्यंत सादर करता येणार आहेत.
याशिवाय, ऑनलाइन अर्जासोबत आवश्यक असलेली अकॅडेमिक, टीचिंग अँड रिसर्च क्रेडेन्शियल (ATR) कागदपत्रांच्या तीन प्रतींसह अर्जाचा प्रिंटआउट ९ जानेवारी २०२६ रोजी सायंकाळी ५ वाजेपर्यंत मुंबई विद्यापीठाच्या फोर्ट येथील विभागात (कक्ष क्रमांक २५) जमा करता येणार आहे.
यापूर्वी अर्ज करण्याची अंतिम तारीख १८ डिसेंबर निश्चित करण्यात आली होती; मात्र उमेदवारांकडून आलेल्या सूचना तसेच काही प्रशासकीय कारणांचा विचार करून ही मुदतवाढ देण्याचा निर्णय घेण्यात आला असल्याचे विद्यापीठ प्रशासनाने स्पष्ट केले आहे. या निर्णयामुळे अद्याप अर्ज न करू शकलेल्या किंवा कागदपत्रांची पूर्तता करण्यात अडचणी येत असलेल्या अनेक उमेदवारांना मोठा दिलासा मिळाला आहे.
भरती प्रक्रियेत अधिक पारदर्शकता राखणे आणि जास्तीत जास्त पात्र उमेदवारांना संधी उपलब्ध करून देणे हा या निर्णयामागील मुख्य उद्देश असल्याचे प्रशासनाने नमूद केले आहे. त्यामुळे सर्व इच्छुक व पात्र उमेदवारांनी मुंबई विद्यापीठाच्या अधिकृत संकेतस्थळावर प्रसिद्ध करण्यात आलेली सुधारित अधिसूचना काळजीपूर्वक वाचून दिलेल्या मुदतीत अर्ज प्रक्रिया पूर्ण करण्याचे आवाहन कुलसचिव डॉ. प्रसाद करांडे यांनी केले आहे.
Comments are closed.