२०२५ पासून नवी परीक्षा पद्धती
महाराष्ट्र लोकसेवा आयोगाची (MPSC) परीक्षा आता केंद्रीय लोकसेवा आयोगाच्या (UPSC) धर्तीवर वर्णनात्मक स्वरूपात होणार आहे. तसेच, मुलाखतीसह संपूर्ण वेळापत्रक निश्चित करण्यात येईल, अशी माहिती मुख्यमंत्री देवेंद्र फडणवीस यांनी विधान परिषदेत दिली.
एमपीएससी परीक्षेचा नवा बदल
महाराष्ट्रातील विद्यार्थी यूपीएससीसोबत एमपीएससीचीही तयारी करत असतात. मात्र, यूपीएससीमध्ये वर्णनात्मक, तर एमपीएससीमध्ये बहुपर्यायी प्रश्नपत्रिका असल्याने विद्यार्थ्यांना दुहेरी मेहनत घ्यावी लागत होती. आता २०२५ पासून दोन्ही परीक्षा पद्धती एकसमान होणार आहे.
नियुक्ती प्रक्रियेला गती
एमपीएससीने १२ नोव्हेंबर २०२४ रोजी ६१७ उमेदवारांची शिफारस केली होती. त्यातील ५४० उमेदवारांना नियुक्ती आदेश देण्यात आले आहेत. तसेच, नवीन पदे आणि सुधारित आकृतीबंध मंजुरीसाठी कार्यवाही सुरू असल्याचे फडणवीस यांनी सांगितले.
आयोगाची पुनर्रचना
वर्ग १, वर्ग २ आणि वर्ग ३ ची पदभरती वेगाने करण्यासाठी एमपीएससीच्या पुनर्रचनेची प्रक्रिया सुरू आहे. या निर्णयामुळे विद्यार्थ्यांना यूपीएससी आणि एमपीएससीसाठी एकसमान तयारी करता येईल.
स्पर्धा परीक्षांना नवी दिशा
२०२५ पासून एमपीएससी परीक्षेत मोठा बदल होत असून, अधिक संधी आणि योग्य नियोजनाने परीक्षार्थींना फायदा होणार आहे.
