महाराष्ट्र लोकसेवा आयोगाकडून (MPSC) गट-क संवर्गातील तब्बल ९३८ पदांची मोठी भरती जाहीर करण्यात आली आहे. या भरतीत उद्योग निरीक्षक, तांत्रिक सहायक, कर सहायक, तसेच लिपिक-टंकलेखक या पदांचा समावेश असून, ही भरती महाराष्ट्र गट-क सेवा संयुक्त परीक्षा २०२६ द्वारे केली जाणार आहे.
परीक्षेची जाहिरात प्रसिद्ध झाली असून, या भरतीकडे राज्यभरातील स्पर्धा परीक्षा देणाऱ्या विद्यार्थ्यांचे लक्ष लागले आहे.
या भरतीसाठी संयुक्त पूर्व परीक्षा आणि मुख्य परीक्षा असे दोन टप्पे असतील. पूर्व परीक्षा १०० गुणांची, तर मुख्य परीक्षा ४०० गुणांची असणार आहे. लिपिक-टंकलेखक आणि कर सहायक पदांसाठी उमेदवारांना टंकलेखन कौशल्य चाचणी अनिवार्य असेल. या भरतीसाठीची पूर्व परीक्षा ४ जानेवारी २०२६ रोजी आयोजित करण्यात आली असून, मुख्य परीक्षा त्यानंतर होईल.
अर्ज प्रक्रिया ऑनलाईन पद्धतीने सुरू झाली असून, उमेदवारांना अर्ज सादर करण्याची शेवटची तारीख २७ ऑक्टोबर २०२५ निश्चित करण्यात आली आहे. खुल्या प्रवर्गासाठी अर्ज शुल्क ₹३९४, मागासवर्गीय/EWS व अनाथ प्रवर्गासाठी ₹२९४, तर माजी सैनिकांसाठी ₹४४ रुपये ठेवण्यात आले आहे. मुख्य परीक्षेसाठी अनुक्रमे ₹५४४, ₹३४४ आणि ₹४४ शुल्क लागू होईल.
शैक्षणिक पात्रतेनुसार, उद्योग निरीक्षक पदासाठी अभियांत्रिकी किंवा विज्ञान शाखेची पदवी, तर इतर संवर्गांसाठी मान्यताप्राप्त विद्यापीठाची पदवी आवश्यक आहे. आयोगाने स्पष्ट केले आहे की, ही भरती पूर्णपणे पारदर्शक व गुणवत्तेनुसार होणार असून, कोणत्याही उमेदवारावर अन्याय होऊ दिला जाणार नाही. ही भरती राज्यातील तरुणांसाठी एक मोठी रोजगाराची संधी ठरणार आहे.
