Mira-Bhayandar Municipal Corporation अंतर्गत चालणाऱ्या शाळांमधील विद्यार्थ्यांना पुढील शैक्षणिक वर्षापासून नव्या स्वरूपाचा गणवेश देण्याचा महत्त्वाचा निर्णय घेण्यात आला आहे. खासगी शाळांच्या धर्तीवर आकर्षक आणि नीटनेटका गणवेश विद्यार्थ्यांना देण्याचा पालिका प्रशासनाचा प्रयत्न आहे. यासाठी गणवेश खरेदीची निविदा प्रक्रिया सुरू करण्यात आली असून नवीन शैक्षणिक वर्षाच्या पहिल्याच दिवशी विद्यार्थ्यांना नवा गणवेश उपलब्ध करून देण्याचे नियोजन करण्यात येत आहे.
मिरा-भाईंदर महानगरपालिकेच्या एकूण ३६ शाळांमध्ये हिंदी, उर्दू, मराठी आणि गुजराती माध्यमातून शिक्षण दिले जाते. या शाळांमध्ये विद्यार्थ्यांना अनेक सुविधा मोफत दिल्या जात असल्या तरी गेल्या काही वर्षांत विद्यार्थ्यांची संख्या घटत असल्याचे दिसून आले आहे. त्यामुळे पालिका शाळांतील शिक्षणाचा दर्जा उंचावून तो खासगी शाळांच्या तोडीचा करण्यासाठी प्रशासन विविध सुधारणा राबवत आहे.
याच पार्श्वभूमीवर दिल्लीच्या शिक्षण मॉडेलच्या धर्तीवर विद्यार्थ्यांना अधिक चांगल्या सुविधा उपलब्ध करून देण्याचे प्रयत्न सुरू आहेत. सेमी-इंग्लिश शिक्षण, डिजिटल वर्गखोल्या, शाळांची रंगरंगोटी, तसेच इयत्ता दहावीपर्यंत शाळांचा विस्तार अशा अनेक उपक्रमांची अंमलबजावणी करण्यात आली आहे. त्याचाच एक भाग म्हणून जुन्या गणवेशाऐवजी नव्या शैलीचा गणवेश देण्याचा निर्णय यापूर्वी घेतला होता. मात्र काही कारणांमुळे तो निर्णय मागे घेतल्याने गेल्या दोन वर्षांपासून विद्यार्थ्यांना गडद आणि फिकट निळ्या रंगाचा जुना गणवेशच देण्यात येत होता.
महासभेत काही नगरसेवकांनी गणवेशाच्या डिझाइनमध्ये बदल करून तो खासगी शाळांप्रमाणे असावा, अशी मागणी केली होती. त्यानुसार महापौर डिंपल मेहता आणि उपमहापौर ध्रुवकिशोर पाटील यांनी गणवेश बदलण्याचा निर्णय जाहीर केला. प्रशासनाने गणवेश खरेदीसाठी निविदा प्रक्रिया सुरू केली असून नवीन शैक्षणिक वर्षाच्या पहिल्याच दिवशी विद्यार्थ्यांना नवा गणवेश मिळावा, असा प्रयत्न सुरू असल्याची माहिती उपमहापौरांनी दिली आहे.
Comments are closed.