MHADA नाशिक मंडळाने शहरातील चुंचाळे, पाथर्डी, मखमलाबाद, आडगाव आणि सातपूर शिवार येथील गृहनिर्माण प्रकल्पांमधील ४०२ परवडणारी घरे विक्रीसाठी जाहीर केली आहेत. ही घरे आगाऊ अंशदान तत्त्वावर उपलब्ध होणार असून, किंमती ₹१४.९४ लाख ते ₹३६.७५ लाख इतक्या ठेवण्यात आल्या आहेत.
मुंबईतील वांद्रे मुख्यालयात लॉटरीसाठीच्या ऑनलाइन नोंदणीला ‘MHADA’चे उपाध्यक्ष संजीव जयस्वाल यांनी सुरुवात केली. त्यांनी सांगितले की, २०२५ मध्ये नाशिक मंडळाकडून ही चौथी लॉटरी असून, यापूर्वी तीन लॉटरीत मिळून ८४६ घरे उपलब्ध करण्यात आली आहेत. नागरिकांना परवडणारी घरे देण्याचा सातत्यपूर्ण प्रयत्न MHADAकडून सुरूच आहे.
ही घरे सध्या बांधकामाच्या टप्प्यात आहेत. लॉटरीत नाव निघाल्यानंतर निवडलेल्या घराची रक्कम पाच हप्त्यांमध्ये भरण्याची सुविधा देण्यात आली आहे. त्यामुळे मध्यम व अल्पउत्पन्न गटासाठी घर मिळवणे अधिक सोपे होणार आहे.
लॉटरीत एकूण २९३ घरे अल्प उत्पन्न गटासाठी, तर १०९ घरे मध्यम उत्पन्न गटासाठी राखीव आहेत. चुंचाळे शिवारात १३८, पाथर्डीत ३०, मखमलाबादमध्ये ४८ आणि आडगावमध्ये ७७ अशी घरांची संख्या आहे. तर एमआयजीसाठी सातपूर, पाथर्डी आणि आडगाव येथे घरे देण्यात आली आहेत.
अर्जदाराने १ एप्रिल २०२४ ते ३१ मार्च २०२५ या कालावधीतील उत्पन्नाचा पुरावा जमा करणे आवश्यक आहे. आयकर विवरणपत्र किंवा तहसील कार्यालयाचे उत्पन्न प्रमाणपत्र—यापैकी एक कागदपत्र पुरेसे मानले जाणार आहे.
Comments are closed.