राज्यातील वैद्यकीय शिक्षण क्षेत्रातील इच्छुक विद्यार्थ्यांसाठी मोठी बातमी समोर आली आहे. महाराष्ट्र राज्य सामाईक प्रवेश परीक्षा परिषदेमार्फत (CET Cell) एमबीबीएस, बीडीएस, बीएएमएस, बीएचएमएस, बीयूएमएस, बीएनवायएस, बीपीटीएच, बीओटीएच, बीएएसएलपी आणि बीपीओ या अभ्यासक्रमांच्या प्रवेश प्रक्रियेचे वेळापत्रक जाहीर करण्यात आले आहे. या सर्व अभ्यासक्रमांसाठी २३ जुलै २०२५ पासून ऑनलाइन नोंदणीला सुरुवात झाली असून, अर्ज करण्याची अंतिम तारीख ३० जुलै आहे.
विद्यार्थ्यांनी या कालावधीत आपली नोंदणी पूर्ण करून शुल्क भरावे, तसेच आवश्यक कागदपत्रे संकेतस्थळावर अपलोड करणे आवश्यक आहे. त्यानंतर, २ ऑगस्ट रोजी अंतरिम (तात्पुरती) गुणवत्ता यादी जाहीर केली जाणार असून त्यात विद्यार्थ्यांची प्राथमिक गुणवत्ता आणि उपलब्ध जागांची माहिती देण्यात येईल. ही यादी पुढील प्रक्रियेचा पाया ठरणार आहे.
३ ते ५ ऑगस्टदरम्यान विद्यार्थ्यांना महाविद्यालय आणि अभ्यासक्रम निवडीचा पर्याय (ऑप्शन फॉर्म) उपलब्ध करून दिला जाईल. गुणवत्तेनुसार कॉलेजची निवड केल्यानंतर, ७ ऑगस्ट रोजी पहिली गुणवत्ता यादी जाहीर केली जाणार आहे. या यादीतील पात्र विद्यार्थ्यांना ८ ते १२ ऑगस्ट या दरम्यान निवडलेल्या महाविद्यालयात जाऊन प्रत्यक्ष प्रवेश घेणे बंधनकारक असणार आहे.
या प्रवेश प्रक्रियेत सर्वच सरकारी, सरकारी अनुदानित, पालिका महाविद्यालयांसह खासगी विनाअनुदानित वैद्यकीय महाविद्यालयांचा समावेश आहे. विशेष बाब म्हणजे यंदा खासगी विनाअनुदानित महाविद्यालयांमध्येही ‘EWS – आर्थिकदृष्ट्या दुर्बल घटक’ आरक्षण लागू करण्यात आले आहे. यामुळे खुल्या प्रवर्गातील EWS विद्यार्थ्यांसाठी प्रवेशाचा आणि शुल्क सवलतीचा मार्ग मोकळा झाला आहे.
पूर्वी हे आरक्षण केवळ सरकारी आणि अनुदानित महाविद्यालयांमध्येच लागू होतं. मात्र, आता खासगी महाविद्यालयांतील राज्य कोट्यातील एकूण जागांपैकी १०% जागा EWS साठी राखीव ठेवण्याचे आदेश आहेत. यामुळे राज्यातील आर्थिकदृष्ट्या कमकुवत पार्श्वभूमीच्या विद्यार्थ्यांना मोठा दिलासा मिळणार आहे. महाराष्ट्र हे हे आरक्षण खासगी कॉलेजांमध्ये लागू करणारे देशातील पहिले राज्य ठरणार आहे.
राज्य सामाईक प्रवेश परीक्षा कक्षाने यासंदर्भातील माहिती पुस्तिका आणि तपशीलवार वेळापत्रक अधिकृत संकेतस्थळावर प्रकाशित केले आहे. त्यामुळे इच्छुक विद्यार्थ्यांनी लवकरात लवकर नोंदणी प्रक्रिया पूर्ण करून पुढील टप्प्यांसाठी तयारी सुरू ठेवावी. ही प्रवेश प्रक्रिया शनिवार, रविवार व सुट्ट्यांनाही सुरू राहणार असल्याने विद्यार्थ्यांना वेळेची अडचण भासणार नाही.
NEET-UG 2025 च्या आधारावर सुरु झालेली ही प्रवेश प्रक्रिया फक्त नोंदणीपुरती मर्यादित नसून, विद्यार्थ्यांच्या वैद्यकीय कारकिर्दीच्या स्वप्नांची पहिली पायरी आहे. त्यामुळे प्रत्येक टप्पा नीट समजून घेणे, वेळेवर कागदपत्रे सादर करणे आणि महाविद्यालय निवड काळजीपूर्वक करणे अत्यंत महत्त्वाचे ठरणार आहे.
Comments are closed.