छत्रपती संभाजीनगरमध्ये मोठा प्रकार उघडकीस आला आहे. एमसीएच्या विद्यार्थ्यांना परीक्षा सुरू असताना हॉलतिकीटच न मिळाल्याने ते थेट परीक्षेला बसू शकले नाहीत. श्री साई इन्स्टिट्यूट ऑफ मॅनेजमेंट अँड रिसर्च या महाविद्यालयातील विद्यार्थी संतापले आणि त्यांनी महाविद्यालयात ठिय्या देऊन नंतर पोलिस ठाण्यात धाव घेतली.
विद्यार्थ्यांनी सांगितले की, वारंवार विचारूनही महाविद्यालयाने हॉलतिकीट देण्यास टाळाटाळ केली. शेवटी प्रश्न गंभीर होताच शंभराहून अधिक विद्यार्थी पोलिस ठाण्याबाहेर जमा झाले. शैक्षणिक वर्ष वाया जाण्याच्या भीतीने काही विद्यार्थ्यांचे डोळे पाणावले.
नंतर उघड झाले की या महाविद्यालयाला विद्यापीठाचे संलग्नीकरणच झालेले नाही. समितीने महाविद्यालयातील मूलभूत सुविधांवरील अनेक त्रुटी दाखवून संलग्नीकरण नाकारले होते. प्राचार्यांची अनुपलब्धता, शिक्षक नेमणुका नाहीत, संगणकांची कमतरता, पुस्तकांची खरेदी नाही, दिव्यांगांसाठी सुविधा नाही—अशा अनेक गोष्टींवर विद्यापीठाने आक्षेप नोंदवले होते.
विद्यापीठ प्रशासनाने स्पष्ट केले की, संलग्नीकरणच नसताना परीक्षा अर्ज कसे स्वीकारले गेले, हे महाविद्यालयाने स्पष्ट करावे.
पोलिस आयुक्तांनी कुलगुरूंशी संपर्क साधून पुढील कार्यवाही सुरू केली.
Comments are closed.