राज्य सामाईक प्रवेश परीक्षा कक्ष (CET Cell) मार्फत शैक्षणिक वर्ष २०२६-२७ साठी Master of Computer Application (MCA) या पदव्युत्तर अभ्यासक्रमाची प्रवेश परीक्षा आज (३० मार्च) राज्यभरात पार पडत आहे. यंदा या परीक्षेसाठी तब्बल ५५ हजार ५६७ विद्यार्थ्यांनी नोंदणी केली असून, सर्व ३६ जिल्ह्यांतील विविध परीक्षा केंद्रांवर संगणकाधारित (Computer-Based) पद्धतीने ही परीक्षा आयोजित करण्यात आली आहे.
या परीक्षेत विशेष बाब म्हणजे १९६ अनाथ विद्यार्थी आणि ९६ दिव्यांग विद्यार्थ्यांचाही सहभाग आहे, ज्यामुळे सर्वसमावेशक शिक्षण व्यवस्थेचे चित्र समोर येते. मागील काही वर्षांच्या तुलनेत एमसीए प्रवेश परीक्षेच्या नोंदणीमध्ये मोठी वाढ झाल्याचे दिसून येत आहे. विशेषतः २०२३-२४ च्या तुलनेत यंदा जवळपास २० हजारांनी अधिक विद्यार्थ्यांनी अर्ज केला आहे. २०२४-२५ मध्ये ४० हजार विद्यार्थ्यांनी नोंदणी केली होती, तर २०२५-२६ मध्ये ही संख्या ५६ हजारांवर गेली होती.
दरम्यान, बीएड (General, Special व ELCT) अभ्यासक्रमासाठी घेण्यात आलेल्या प्रवेश परीक्षांना विद्यार्थ्यांचा चांगला प्रतिसाद मिळाला आहे. २७ ते २९ मार्चदरम्यान तीन सत्रांत पार पडलेल्या या परीक्षेला एकूण ८८.२० टक्के उपस्थिती नोंदवण्यात आली. बीएड परीक्षेसाठी १ लाख १० हजार ४२ विद्यार्थ्यांनी नोंदणी केली होती, त्यापैकी मोठ्या संख्येने विद्यार्थ्यांनी परीक्षा दिली.
एकूणच, एमसीए आणि बीएड या दोन्ही अभ्यासक्रमांच्या प्रवेश परीक्षांमध्ये विद्यार्थ्यांचा वाढता सहभाग दिसून येत असून, उच्च शिक्षणाबाबत तरुणांमध्ये वाढती जागरूकता आणि स्पर्धा स्पष्ट होत आहे.
Comments are closed.