‘मुख्यमंत्री माझी शाळा सुंदर शाळा’ योजनेचा तिसरा टप्पा अखेर सुरू होत असल्याची घोषणा शिक्षण विभागाने केली आहे. महाराष्ट्र टाइम्सने प्रकाशित केलेल्या वृत्तामुळे या योजनेबाबत सरकारला स्पष्टीकरण द्यावं लागलं आणि आता या उपक्रमाला पुन्हा एकदा गती मिळत असल्याचं स्पष्ट झालं आहे.
ही योजना माजी मुख्यमंत्री एकनाथ शिंदे यांच्या काळात सुरू करण्यात आली होती. राज्यातील शाळा अधिक स्वच्छ, आकर्षक आणि आधुनिक व्हाव्यात, शैक्षणिक वातावरण सुधारावं, आणि विद्यार्थ्यांना प्रेरणादायी शिक्षणाचा अनुभव मिळावा हा या योजनेचा उद्देश आहे. पण गेल्या काही महिन्यांपासून या योजनेला निधीअभावी आणि प्रशासकीय कारणांमुळे स्थगिती मिळाली होती. त्यामुळे शिक्षक आणि शाळा व्यवस्थापनांमध्ये नाराजी होती, तर राजकीय पातळीवर चर्चांना उधाण आलं होतं.
आता शिक्षण विभागाने स्पष्ट केलं आहे की २०२५-२६ या वर्षासाठी ८६.७३ कोटी रुपयांची अर्थसंकल्पीय तरतूद करण्यात आली आहे. या निधीच्या आधारे योजना सुधारित निकषांसह आणि नवीन उपक्रमांसह पुन्हा सुरू केली जाणार आहे. म्हणजेच शाळांमधील पायाभूत सुविधा उभारणी, स्वच्छता, डिजिटल साधनांची उपलब्धता आणि विद्यार्थ्यांसाठी सर्जनशील शिक्षणाच्या संधींवर अधिक भर दिला जाणार आहे.
दरम्यान, काँग्रेसचे वरिष्ठ नेते आणि विरोधी पक्षनेते विजय वडेट्टीवार यांनी सरकारवर जोरदार निशाणा साधला आहे. त्यांनी ‘एक्स’वरून प्रतिक्रिया देताना म्हटलं की, “महायुती सरकार म्हणजे तीन तिघाडा, काम बिघाडा. एका पक्षाकडून योजना जाहीर होते, दुसऱ्याचा अर्थमंत्री निधी देत नाही, आणि तिसरा पक्ष योजना गुंडाळतो.” त्यांच्या या टीकेमुळे पुन्हा एकदा सरकारच्या कामकाजावर प्रश्नचिन्ह उपस्थित झाले आहे.
या योजनेचा तिसरा टप्पा सुरू होत असल्याने राज्यातील अनेक शाळांमध्ये पुन्हा उत्साहाचे वातावरण आहे. शिक्षक आणि विद्यार्थी दोघेही अपेक्षा व्यक्त करत आहेत की, या वेळी योजना केवळ कागदावर न राहता प्रत्यक्षात अमलात येईल आणि शाळांचे खरेच “सुंदर रूपांतर” दिसेल
Comments are closed.