‘मुख्यमंत्री माझी लाडकी बहीण योजना’ पुन्हा एकदा चर्चेत आली आहे. कारण योजनेअंतर्गत लाभ घेणाऱ्या बहिणींसाठी eKYC प्रक्रिया अनिवार्य करण्यात आली आहे. मात्र या प्रक्रियेत OTP न येणे, सर्व्हर डाउन होणे, आणि वेबसाइट न उघडणे अशा तांत्रिक अडचणींमुळे अनेक बहिणी त्रस्त झाल्या आहेत. रात्रभर जागूनही अनेकांनी eKYC पूर्ण करण्यात यश मिळवलेले नाही. त्यामुळे आता सर्वांच्या मनात एकच प्रश्न — “eKYC नाही झालं तर दिवाळीचा हप्ता मिळणार का?”
सरकारकडून मिळालेल्या माहितीनुसार, eKYC साठी दोन महिन्यांची मुदत दिली आहे. त्यामुळे सप्टेंबर आणि ऑक्टोबरचे हप्ते थांबवले जातील, असा कोणताही शासन निर्णय झालेला नाही. म्हणजेच या दोन महिन्यांचे पैसे पात्र लाभार्थींना मिळणार आहेत. मात्र eKYC प्रक्रिया पूर्ण न केल्यास नोव्हेंबरपासून पैसे थांबवले जाण्याची शक्यता नाकारता येत नाही.
गेल्या वर्षी दिवाळीच्या काळात सरकारने दोन हप्ते अॅडव्हान्समध्ये दिले होते — एक चालू महिन्याचा आणि दुसरा पुढील महिन्याचा — त्यामुळे प्रत्येक बहिणीला ४५०० रुपये मिळाले होते. त्यावेळी विधानसभा निवडणुका असल्याने हा निर्णय घेतला गेला होता. यंदाही स्थानिक स्वराज्य संस्थांच्या निवडणुका जवळ आल्याने सरकार बहिणींना नाराज करणार नाही, अशी अपेक्षा व्यक्त केली जात आहे.
महिला व बालविकास मंत्री अदिती तटकरे यांनी स्पष्ट केलं आहे की, “OTP संबंधित तांत्रिक अडचणी दूर करण्याचं काम सुरू आहे. तज्ज्ञांची मदत घेऊन पोर्टल अधिक सक्षम केलं जात आहे. काही दिवसांत eKYC प्रक्रिया पूर्णतः सुरळीत होईल. त्यामुळे बहिणींनी घाबरून जाऊ नये.”
दरम्यान, eKYC करण्यासाठी राज्य सरकारने ladkibahin.maharashtra.gov.in हे अधिकृत पोर्टल उपलब्ध करून दिलं आहे. या ठिकाणी आधार क्रमांक, OTP प्रमाणीकरण, आणि जातीची माहिती भरून प्रक्रिया पूर्ण करता येते. एकदा प्रक्रिया यशस्वीरीत्या पूर्ण झाली की स्क्रीनवर पुष्टी संदेश दिसतो.
तज्ज्ञांच्या मते, या तांत्रिक अडचणी काही दिवसांत सुटतील आणि बहिणींना त्यांच्या हप्त्यांबाबत कोणताही अडथळा येणार नाही. सरकारही eKYC ची अंतिम मुदत वाढवण्याचा विचार करत असल्याचे संकेत मिळाले आहेत. त्यामुळे दिवाळीपूर्वी हप्ता मिळेल, अशी आशा सर्व लाडक्या बहिणी करत आहेत.
अदिती तटकरे यांनी आश्वासन दिलं आहे – “सरकार कोणत्याही बहिणीचा हप्ता रोखणार नाही. तांत्रिक अडचणींवर उपाययोजना सुरू आहेत. सर्व लाभार्थींना वेळेत मदत मिळेल.” या वक्तव्यानंतर लाडक्या बहिणींची चिंता काहीअंशी कमी झाल्याचं दिसतं आहे.
Comments are closed.