नागपूर जिल्ह्यातील तब्बल ९५ हजार लाडक्या बहिणी ‘मुख्यमंत्री माझी लाडकी बहीण योजने’चा लाभ अचानक बंद झाल्याने मोठ्या संकटात सापडल्या आहेत. अपात्र ठरवून दरमहा मिळणारे ₹१,५०० थांबवले गेल्याची माहिती महिला व बालविकास विभागाला मिळाली असून सध्या संपूर्ण यादीची छाननी सुरू आहे.
राज्यात निवडणुकीपूर्वी गाजलेली ही योजना—महिलांचे आर्थिक स्वातंत्र्य, पोषण आणि कुटुंबातील निर्णयक्षमता मजबूत करण्यासाठी सुरु करण्यात आली. मध्य प्रदेशात मिळालेल्या यशानंतर ही योजना महाराष्ट्रात राबविण्यात आली आणि मोठी लोकप्रियताही मिळाली.
‘आम्हाला न्याय द्या!’ – लाभ बंद झालेल्या बहिणींचा आक्रोश
पात्र असूनही अचानक अपात्र ठरवल्याने अनेक बहिणी विभागाकडे धाव घेत आहेत.
- सुनीता आठवले यांनी “माझ्याकडे कार नाही” असा दाखला देत माहिती चुकीची नोंदवल्याची तक्रार केली.
- अनिता मिश्रा यांनीही प्रशासनाला पत्र पाठवून “मी पडक्या घरात राहते, तपास करा” असे नमूद केले.
- अश्विनी तितरमारे यांनी परिवहन विभागाचे पुरावे जोडून आपली अडचण मांडली.
८ हजार जणी अपात्र; बाकी तपास सुरू
महायुतीला बहुमत मिळाल्यानंतर आता पात्र-अपात्रांची मोठी छाननी सुरू आहे. आतापर्यंत ८ हजार महिला अपात्र असल्याचे स्पष्ट झाले असून उर्वरित अर्जांची तपासणी सुरु आहे. चुकीने कार असल्याचा उल्लेख झालेल्या महिलांची माहिती राज्य शासनाकडे पाठविण्यात येत आहे, असे महिला व बालविकास अधिकारी सुनील मेसरे यांनी सांगितले. तसेच e-KYC ची अंतिम तारीख ३१ डिसेंबरपर्यंत वाढवली असल्याचेही त्यांनी सांगितले.
जिल्ह्यातील लाभार्थ्यांची आकडेवारी (नारीशक्ती अॅपनुसार)
- नागपूर शहर : २,१०,३१४
- कामठी : ३४,६८४
- मौदा : २५,३९९
- पारशिवनी : १९,६९३
- रामटेक : १८,६६०
- सावनेर : ३२,६०९
- नागपूर ग्रामीण : ५८,४२७
- हिंगणा : ३१,४९३
- भिवापूर : १३,६७१
- कुही : १९,२४२
- उमरेड : १९,८४१
- काटोल : २२,२२६
- कळमेश्वर : १८,९५०
- नरखेड : २४,८४४
एकूण जिल्हा लाभार्थी: १०,६३,६०९
अपात्र ठरविण्याची प्रमुख कारणे
- वार्षिक उत्पन्न ₹२.५ लाखांपेक्षा जास्त
- बँक खात्याशी आधार-पॅन लिंक नसणे
- पॅनवरील आर्थिक उलाढाल जास्त
- पुरुषांनी लाभ घेतल्याचे आढळणे
- सरकारी महिला कर्मचारी
- संजय गांधी निराधार योजनेतील लाभार्थी
- ६५ वर्षांवरील महिलांनीही लाभ घेतलेला
- एका कुटुंबातील अनेकांना लाभ—नियम मोडीत
शासनाने सुरुवातीला निकषांच्या काटेकोर अंमलबजावणीकडे दुर्लक्ष केल्याने जनतेचा पैसा वाया गेला, असा तीव्र रोष लोकांमध्ये आहे.
Comments are closed.