राज्यातील पोलिस आणि त्यांच्या कुटुंबीयांसाठी असलेल्या महाराष्ट्र पोलिस कुटुंब आरोग्य योजनेचे कोट्यवधी रुपये सरकारने थकवल्याने खासगी रुग्णालये उपचार करण्यास नकार देत आहेत. “आधी बिले द्या, मग उपचार करू” अशी भूमिका डॉक्टरांनी घेतली आहे. त्यामुळे पोलिस आणि त्यांच्या कुटुंबीयांना आरोग्य सेवेसाठी मोठ्या अडचणींना सामोरे जावे लागत आहे.
सरकारच्या थकबाकीमुळे पोलिसांना फटका
सर्वसामान्यांसाठी असलेल्या माहात्मा फुले आरोग्य योजनेच्या धर्तीवर पोलिस आणि त्यांच्या कुटुंबीयांना मोफत उपचार मिळण्यासाठी ही योजना सुरू करण्यात आली होती. मात्र, ‘लाडकी बहीण’ योजनेसाठी मोठ्या प्रमाणात निधी खर्च केल्याने सरकारकडे इतर योजनांसाठी निधीच शिल्लक नाही. त्यामुळे पोलिसांच्या आरोग्य योजनेचे पैसे रखडले असून, त्याचा थेट परिणाम पोलिसांच्या आरोग्यावर होत आहे.
रुग्णालये सरकारकडून बिलांच्या प्रतीक्षेत
राज्यात अडीच लाखांहून अधिक पोलिस कर्मचारी कार्यरत आहेत. गेल्या दोन वर्षांत अनेक पोलिस कुटुंबीयांनी या योजनेअंतर्गत उपचार घेतले. मात्र, सरकारने रुग्णालयांची बिले थकवल्याने आता डॉक्टरांनी थेट पोलिसांच्या उपचारांनाही नकार द्यायला सुरुवात केली आहे.
एका डॉक्टरांनी सांगितले,
“आम्हाला अजूनही महात्मा फुले योजनेचे कोट्यवधी रुपये मिळालेले नाहीत. पोलिस आरोग्य योजनेच्या बिलांसाठी वर्षभर हेलपाटे मारत आहोत, पण काही हालचाल होत नाही. त्यामुळे आम्ही आता रुग्ण दाखल करणेच बंद केले आहे.”
पोलिस कुटुंबीयांना स्वतःचा खर्च करावा लागत आहे
योजनेअंतर्गत उपचार घेण्यासाठी गेलेल्या पोलिस कुटुंबांना मोठ्या आर्थिक संकटाचा सामना करावा लागत आहे.
संजय कोरे, एका रुग्णाच्या नातेवाईकांनी सांगितले,
“आम्ही पोलिस आरोग्य योजनेअंतर्गत उपचार घेण्यासाठी रुग्णालयात गेलो, पण त्यांनी सरळ नकार दिला. आता आमच्या खिशातून खर्च करावा लागत आहे, जो खूपच जड जात आहे.”
राज्य सरकारच्या अनास्थेमुळे पोलिस आणि त्यांच्या कुटुंबीयांचे आरोग्य धोक्यात आले आहे. तातडीने निधी न मिळाल्यास परिस्थिती आणखी गंभीर होऊ शकते.
