पुणे जिल्ह्यातील पुरंदर तालुक्यात भव्य आयटी पार्क उभारण्याचा मार्ग मोकळा होत असून, हे महाराष्ट्रातील दुसऱ्या आणि देशातील तिसऱ्या क्रमांकाचे सर्वात मोठे IT पार्क ठरणार आहे.
सध्या हिंजवडी आयटी पार्कवर वाढत्या कंपन्यांमुळे ताण वाढला आहे, तसेच अनेक कंपन्या इतर राज्यांकडे वळत आहेत. ही परिस्थिती बदलण्यासाठी आणि नव्या उद्योगसंधी निर्माण करण्यासाठी हा महत्त्वाकांक्षी प्रकल्प राबवला जात आहे.
उद्योगमंत्री उदय सामंत यांनी विधानसभेत या प्रकल्पाची माहिती देताना सांगितले की, पुरंदरमध्ये आयटी पार्क विकसित करण्यासाठी जमीन हस्तांतरणाची प्रक्रिया सुरू झाली आहे. महसूल विभागाकडील जमीन लवकरच MIDC कडे सुपूर्द केली जाईल आणि त्यानंतर प्रकल्पाला प्रत्यक्ष सुरुवात होईल.
या IT पार्कसाठी दिवे, कोडीत आणि चांबळी परिसरातील सुमारे 572 हेक्टर जागा निश्चित करण्यात आली असून, एकूण सुमारे 1500 एकर क्षेत्रावर हा प्रकल्प उभारला जाणार आहे. प्रस्तावित पुरंदर विमानतळाजवळ असल्याने उत्कृष्ट कनेक्टिव्हिटी आणि लॉजिस्टिक सुविधा मिळणार आहेत.
या नव्या IT पार्कमुळे पायाभूत सुविधा उत्तम प्रकारे विकसित केल्या जाणार असून, वाहतूक कोंडीसारख्या समस्यांवरही तोडगा निघणार आहे. सर्वात महत्त्वाचे म्हणजे, या प्रकल्पामुळे महाराष्ट्रात सुमारे 1 लाख रोजगार निर्माण होण्याची शक्यता आहे, ज्यामुळे तरुणांसाठी मोठी संधी निर्माण होणार आहे.
Comments are closed.