नोकरीच्या शोधात असलेल्या महाराष्ट्रातील युवक-युवतींसाठी एक ऐतिहासिक संधी उपलब्ध झाली आहे. महाराष्ट्र शासनाच्या कौशल्य, रोजगार, उद्योजकता व नाविन्य विभागामार्फत परदेशात करिअर घडविण्याचा नवा मार्ग खुला झाला आहे. विशेष म्हणजे वाशीम जिल्ह्यातील उमेदवारांना याचा थेट लाभ होणार असून इस्राईलमध्ये काळजीवाहू सेवेमध्ये तब्बल ५ हजार पदांसाठी मोठ्या प्रमाणावर भरती प्रक्रिया सुरू झाली आहे.
किमान पात्रता – बारावी उत्तीर्णही संधीस पात्र
या मेगा भरतीसाठी किमान शैक्षणिक पात्रता बारावी उत्तीर्ण अशी ठेवण्यात आली आहे. त्यामुळे उच्च शिक्षण न घेता देखील अनेक उमेदवारांना ही सुवर्णसंधी गाठता येणार आहे. याशिवाय उमेदवाराची किमान उंची १.५ मीटर व किमान वजन ४५ किलो असणे बंधनकारक आहे. आरोग्य प्रमाणित असणे आवश्यक असून, वैद्यकीय तपासणीमध्ये उत्तीर्ण होणे गरजेचे आहे.
काळजीवाहक प्रशिक्षणाची अनिवार्यता
या पदांसाठी उमेदवारांकडे किमान ९० तासांचे काळजीवाहक प्रशिक्षण असणे बंधनकारक आहे. तसेच फिजिओथेरपिस्ट, नर्सिंग असिस्टंट, ए.एन.एम., जी.एन.एम., बी.एस्सी. नर्सिंग, पोस्ट बी.एस्सी. नर्सिंग, आयुर्वेद व होमिओपॅथिक नर्सिंग अशा पदवीधारकांना या भरती प्रक्रियेत विशेष प्राधान्य दिले जाणार आहे. यामुळे वैद्यकीय व आरोग्य क्षेत्रातील प्रशिक्षित उमेदवारांसाठी ही सुवर्णसंधी ठरणार आहे.
वयोमर्यादा २५ ते ४५ वर्षे
या भरतीसाठी अर्ज करणाऱ्या उमेदवारांची वयोमर्यादा २५ ते ४५ वर्षे निश्चित करण्यात आली आहे. यामुळे तरुण उमेदवारांसोबतच अनुभव असलेले उमेदवारही या प्रक्रियेत सहभागी होऊ शकतील. पुरुष आणि महिला उमेदवारांना समान संधी उपलब्ध आहे.
तब्बल दीड लाखांहून अधिक पगार
निवड झालेल्या उमेदवारांना मासिक पगार अंदाजे १,५६,६८५ रुपये इतका मिळणार आहे. यासोबतच भोजन, निवास व वैद्यकीय सुविधा ही मोफत उपलब्ध करून दिल्या जाणार आहेत. त्यामुळे उमेदवारांचा जीवनमानाचा दर्जा उंचावणार असून आर्थिक स्थैर्यही प्राप्त होणार आहे.
नोकरीची स्थिरता आणि करार कालावधी
या पदांसाठी नोकरीचा करार किमान पाच वर्षांचा असणार आहे. त्यामुळे उमेदवारांना दीर्घकालीन व स्थिर रोजगार मिळणार असून करिअरच्या दृष्टीने ही संधी अत्यंत महत्त्वाची ठरणार आहे. प्रतिष्ठित आणि सुरक्षित नोकरीची हमीही या माध्यमातून उमेदवारांना मिळणार आहे.
अर्ज करण्याची प्रक्रिया
इच्छुक उमेदवारांना फक्त ऑनलाईन पद्धतीने अर्ज करावा लागणार आहे. यासाठी https://maharashtrainternational.com/jobDetail.aspx
या संकेतस्थळावर भेट द्यावी लागेल. अर्ज प्रक्रियेत अडचणी आल्यास उमेदवारांनी जिल्हा कौशल्य विकास, रोजगार व उद्योजकता मार्गदर्शन केंद्र, वाशीम येथे थेट संपर्क साधावा.
युवकांसाठी नव्या दिशेची संधी
इस्राईलमधील या रोजगार मोहिमेमुळे वाशीमसह महाराष्ट्रातील युवक-युवतींना परदेशात करिअर करण्याची नवी दिशा मिळणार आहे. या सुवर्णसंधीचा लाभ घेण्यासाठी इच्छुकांनी तातडीने अर्ज करावा, असे आवाहन सहाय्यक आयुक्त प्रवीण खंडारे यांनी केले आहे.
Comments are closed.