राज्य सरकारने नाशिक आणि अमरावती या दोन जिल्ह्यांमध्ये “सेंटर फॉर इन्व्हेन्शन, इनोव्हेशन, इन्क्युबेशन अँड ट्रेनिंग (CIIIT)” स्थापन करण्याचा निर्णय घेतला आहे. या उपक्रमामुळे स्थानिक तरुणांना अत्याधुनिक तंत्रज्ञानाचे प्रशिक्षण मिळून ‘मेक इन महाराष्ट्र’ मोहिमेला नवी गती मिळणार आहे.
उपमुख्यमंत्री आणि अर्थमंत्री अजित पवार यांनी राज्यातील उत्पादन आणि कौशल्यविकास क्षेत्र बळकट करण्याच्या उपक्रमांतर्गत या दोन जिल्ह्यांमध्ये केंद्र सुरू करण्याची घोषणा केली. कौशल्य विकास विभागातील वरिष्ठ अधिकाऱ्यांनी सांगितले की, या निर्णयामुळे महाराष्ट्र उद्योग आणि कौशल्यविकास क्षेत्रात अग्रस्थानी राहील.
काही दिवसांपूर्वी अजित पवार यांनी टाटा टेक्नॉलॉजी कंपनीला पत्र लिहून या प्रकल्पासाठी सहकार्य मागितले होते. कंपनीने यावर सकारात्मक प्रतिसाद देत नाशिक व अमरावती दोन्ही ठिकाणी केंद्र स्थापन करण्यास मंजुरी दिली आहे.
या केंद्रांमुळे स्थानिक तरुणांना कृत्रिम बुद्धिमत्ता (AI), अत्याधुनिक तंत्रज्ञान, आणि उद्योग क्षेत्राशी संबंधित कौशल्यांचे प्रशिक्षण मिळणार आहे. यामुळे युवकांना जागतिक दर्जाचे प्रशिक्षण, तसेच रोजगार आणि स्वयंरोजगाराच्या नव्या संधी उपलब्ध होतील.
नाशिक इंडस्ट्रीज अँड मॅन्युफॅक्चरर्स असोसिएशनचे अध्यक्ष अशिष नाहर आणि उपाध्यक्ष मनीष रावल यांनी सांगितले की, “हे केंद्र राज्य सरकारच्या ‘मेक इन महाराष्ट्र’ संकल्पनेला बळ देणार असून युवकांना जागतिक दर्जाचे कौशल्य आत्मसात करण्याची सुवर्णसंधी मिळेल.”
एकंदरीत, या उपक्रमामुळे नाशिक आणि अमरावती हे दोन्ही जिल्हे उद्योगविकास, कौशल्यनिर्मिती आणि रोजगार निर्मितीचे नवे केंद्रबिंदू बनणार आहेत.
Comments are closed.