इंजिनिअरिंग पूर्ण करून नोकरीच्या प्रतीक्षेत असलेल्या लाखो विद्यार्थ्यांसाठी ही बातमी चिंताजनक आहे. देशातील आयटी क्षेत्रातील दुसऱ्या क्रमांकाची सर्वात मोठी कंपनी इन्फोसिस लिमिटेडने थेट कॉलेज कॅम्पसमधून होणारी फ्रेशर्सची भरती कमी करण्याचा मोठा निर्णय घेतला आहे. त्यामुळे येत्या काळात कॅम्पस प्लेसमेंटमधून मिळणाऱ्या नोकऱ्यांची संख्या लक्षणीयरीत्या घटणार आहे.
इंजिनिअरिंग विद्यार्थ्यांना बसणार थेट फटका
इन्फोसिसच्या या निर्णयाचा सर्वाधिक फटका इंजिनिअरिंगच्या विद्यार्थ्यांना बसणार आहे. ऑटोमेशन, आर्टिफिशियल इंटेलिजन्स आणि कार्यक्षमता वाढल्यामुळे एन्ट्री-लेव्हल म्हणजेच फ्रेशर्सच्या नोकऱ्या कमी होत आहेत. त्यामुळे पदवीधर होताच नोकरी मिळण्याची संधी आता मर्यादित होत चालली आहे.
इन्फोसिसने हा निर्णय का घेतला?
बीएमओ कॅपिटल मार्केट्सच्या विश्लेषकांच्या माहितीनुसार, इन्फोसिस भविष्यात कमी फ्रेशर्सची भरती करून अधिक कुशल आणि उच्च उत्पादकता असलेल्या कर्मचाऱ्यांवर भर देणार आहे. कंपनी प्रति कर्मचाऱ्यामागे महसूल वाढवण्याच्या प्रयत्नात असून, त्यामुळे कमी कर्मचारी – जास्त उत्पादकता हे सूत्र स्वीकारले जात आहे.
आयटी क्षेत्रातील मंदीचे संकेत
बंगळुरूस्थित इन्फोसिस ही पहिली मोठी आयटी कंपनी ठरली आहे, जिने एन्ट्री-लेव्हल नोकऱ्यांमध्ये घट होणार असल्याचे स्पष्ट संकेत दिले आहेत. मॅक्रो-इकॉनॉमिक अनिश्चितता, क्लायंटकडून खर्च कपात, तसेच अमेरिकेतील व्हिसा निर्बंध यामुळे संपूर्ण आयटी क्षेत्र सध्या मंदीचा सामना करत आहे.
यंदा पास होणाऱ्या विद्यार्थ्यांसाठी धोक्याची घंटा
गेल्या दोन वर्षांपासून फ्रेशर्सची भरती मंदावली असून, दरवर्षी पदवीधर होणाऱ्या सुमारे १.३ लाख इंजिनिअरिंग विद्यार्थ्यांसाठी ही मोठी चिंता आहे. 2026 च्या बॅचसाठीही आयटी कंपन्या कमी फ्रेशर्सची भरती करतील, अशी शक्यता वर्तवली जात आहे.
भारतातील टॉप आयटी कंपन्या
भारतामध्ये आयटी क्षेत्रात TCS ही सर्वात मोठी कंपनी असून त्यानंतर इन्फोसिस, HCLTech आणि विप्रो यांचा क्रमांक लागतो. मात्र बदलत्या तंत्रज्ञानामुळे आणि ऑटोमेशनमुळे आता फ्रेशर्ससाठीचा मार्ग अधिक कठीण होत चालला आहे.
एकूणच, आयटी क्षेत्रात करिअर करण्याचे स्वप्न पाहणाऱ्या विद्यार्थ्यांनी आता केवळ पदवीवर न थांबता स्किल्स, नवीन तंत्रज्ञान आणि विशेष प्रशिक्षणावर भर देणे काळाची गरज बनली आहे.
Comments are closed.