भारतीय तंत्रज्ञान संस्था, मुंबई (IIT Mumbai) ने आधुनिक तंत्रज्ञान विषयांमध्ये सखोल ज्ञान मिळवण्यासाठी ‘ई-पदव्युत्तर डिप्लोमा इन कॉम्प्युटर सायन्स अँड इंजिनीअरिंग’ हा नवीन ऑनलाइन अभ्यासक्रम सुरू केला आहे. संगणक प्रोग्रामिंग, संगणन प्रणाली, कृत्रिम बुद्धिमत्ता (AI) आणि मशीन लर्निंग (ML) यांसारख्या अत्याधुनिक विषयांमध्ये कौशल्य वाढवण्याचा हा अभ्यासक्रम विशेषतः सॉफ्टवेअर विकासक, डेटा वैज्ञानिक, माहिती तंत्रज्ञानतज्ज्ञ आणि अभियंत्यांसाठी उपयुक्त ठरणार आहे.
हा अभ्यासक्रम २०२५ च्या जून महिन्यापासून सुरू होणार असून, प्रवेश प्रक्रिया सध्या सुरू आहे. IIT मुंबईच्या संगणकशास्त्र आणि अभियांत्रिकी विभागातील प्राध्यापकांनी हा अभ्यासक्रम विकसित केला आहे. ऑन-कॅम्पस अभ्यासक्रमास समकक्ष असलेल्या या ऑनलाइन अभ्यासक्रमामध्ये थेट ऑनलाइन व्याख्याने, संवादात्मक सत्रे, प्रायोगिक प्रकल्प आणि आभासी प्रयोगशाळा यांचा समावेश असेल. अभ्यासक्रम यशस्वीरीत्या पूर्ण केल्यानंतर विद्यार्थ्यांना IIT मुंबईच्या पदवी प्रदान समारंभात अधिकृत प्रमाणपत्र देण्यात येईल.
भारतात आणि आंतरराष्ट्रीय स्तरावर डिजिटल तंत्रज्ञानाची वाढती मागणी लक्षात घेता, हा अभ्यासक्रम अत्यंत उपयुक्त ठरणार आहे. भविष्यातील तंत्रज्ञान क्षेत्रासाठी कुशल मनुष्यबळ तयार करण्याच्या दृष्टीने IIT मुंबईने ‘ग्रेट लर्निंग’ या नामांकित कंपनीसोबत भागीदारी केली आहे. IIT मुंबईचे संचालक प्रा. शिरीष केदारे यांच्या मते, हा अभ्यासक्रम उद्योग आणि तंत्रज्ञान क्षेत्रातील व्यावसायिकांना AI आणि मशीन लर्निंग यांसारख्या अत्याधुनिक तंत्रज्ञानांचे सखोल ज्ञान मिळवण्यासाठी मदत करेल.
आजच्या युगात संगणकशास्त्र केवळ कोडिंग किंवा अॅप विकासापुरते मर्यादित नसून, डेटा व्यवस्थापन, सायबर सुरक्षा, क्लाऊड कम्प्युटिंग आणि कृत्रिम बुद्धिमत्ता यांसारख्या क्षेत्रांमध्ये त्याची मोठी मागणी आहे. त्यामुळे हा अभ्यासक्रम विद्यार्थ्यांना आधुनिक तंत्रज्ञानाच्या दुनियेत स्वतःचे स्थान निर्माण करण्याची संधी देईल, असे ‘ग्रेट लर्निंग’चे संस्थापक आणि मुख्य कार्यकारी अधिकारी मोहन लखमराजू यांनी सांगितले.
पात्रता आणि प्रवेश प्रक्रिया:
या अभ्यासक्रमासाठी अर्ज करणाऱ्या उमेदवारांकडे BE, B.Tech किंवा चार वर्षांची B.Sc (किंवा तत्सम) पदवी असणे आवश्यक आहे. संगणकशास्त्र किंवा संबंधित क्षेत्रातील उमेदवारांना प्रवेशात प्राधान्य दिले जाणार आहे. IIT मुंबईच्या या नामांकित अभ्यासक्रमाचा लाभ घेण्यासाठी इच्छुक विद्यार्थ्यांनी लवकरात लवकर अर्ज करावा. हा अभ्यासक्रम आधुनिक तंत्रज्ञान क्षेत्रात उज्ज्वल करिअर घडवण्यासाठी एक सुवर्णसंधी ठरणार आहे!
